नवीन रुपात ई-पीक पाहणी DCS मोबाईल ॲप 1 डिसेंबर 2024 पासून संपूर्ण महाराष्ट्रात उपलब्ध

 

नवीन रुपात ई-पीक पाहणी DCS मोबाईल ॲप

1 डिसेंबर 2024 पासून संपूर्ण महाराष्ट्रात उपलब्ध

बुलडाणा, दि. 3 (जिमाका): रब्बी हंगाम 1 डिसेंबर 2024 पासून संपूर्ण महाराष्ट्रात सुरु होत असून शेतकऱ्यांना पीक पाहणी करण्यासाठी आधी ई-पीक पाहणी मोबाईल ॲप उपलब्ध होते. परंतू आता केंद्र शासनाच्या सूचनेप्रमाणे त्यामध्ये काही तांत्रिक दुरुस्ती करुन नवीन रुपात ई-पीक पाहणी DCS उपलब्ध करुन देण्यात आलेले आहे. यानंतर 100 टक्के पीक पाहणी नवीन सुधारित ई-पीक पाहणी DCS मोबाईल ॲपव्दारे संपूर्ण महाराष्ट्रात होणार आहे.

शेतकरी स्वत: पिकांची नोंद ई-पीक पाहणी मोबाईल ॲपव्दारे नोंदवायचे व उर्वरित पीक पाहणी जे शेतकऱ्यांनी नोंदविलेली नाही ते तलाठी यांच्या मार्फत होत असायची. त्यामध्ये दुरुस्ती करुन शेतकऱ्यांना हंगामाच्या पहिल्या दिवसापासून पीक पाहणी करण्यासाठी सहाय्यक यांची नेमणूक करण्यात येत आहे. प्रत्येक गावासाठी 1 सहाय्यक उपलब्ध राहणार असून सहाय्यक मार्फत पीक नोंदणी होणार आहे.

पीक विमा, पीक कर्ज, नैसर्गिक आपत्ती, एमएसपी अंतर्गत पिकांची नोंद इत्यादी सुविधांचा लाभ घेण्यासाठी ई-पीक पाहणी DCS मोबाईल ॲपमध्ये पिकांची नोंद असणे आवश्यक आहे.

नवीन मोबाईल ॲप मधील आवश्यकतेनुसार पीक पाहणीसाठी निवडलेल्या गट क्रमांकापासून 50 मीटरच्या आत फोटो घेणे अनिवार्य आहे. पिकांचे दोन फोटो घेणे बंधनकारक आहे.

सुधारीत मोबाईल ॲप मधील नविन सुविधेनुसार शेतकऱ्यांच्या पीक पाहणी मदतीसाठी हंगाम सुरु होण्याच्या पहिल्या दिवसापासून पीक पाहणी संबंधित समस्या सोडविण्यासाठी सहाय्यक उपलब्ध असेल.

सर्व शेतकऱ्यांनी आपली पीक पाहणी ठराविक मुदतीत करुन घ्यावी, असे आवाहन जिल्हाधिकारी डॉ. किरण पाटील यांनी केले आहे.

*****