news 31.1.2017 dio buldana

पदवीधर मतदारांना मतदानासाठी तीन तासांची सुट्टी

·        पदवीधर विधान परिषद निवडणूक

·        खाजगी आस्थापना कामगार, कर्मचारी यांना सुविधा

    बुलडाणा दि‍.31 - अमरावती विभाग पदवीधर विधान परिषद मतदारसंघ निवडणूक 2017 जाहीर झाली आहे. या निवडणूकीसाठी 3 फेब्रुवारी 2017 रोजी मतदान होणार आहे. या निवडणूकीत मतदानासाठी 3 फेब्रुवारी 2017 रोजी पदवीधर मतदारांनी मतदान करण्यासाठी खाजगी आस्थापनावर असलेल्या कामगार व कर्मचारी यांना तीन तासाची सुट्टी देण्यात येणार आहे. तरी खाजगी आस्थापनांनी तीन तासांची कामगारांना सुट्टी द्यावी. याबाबत जिल्हाधिकारी तथा सहा. निवडणूक निर्णय अधिकारी यांनी आदेश दिले आहेत.

*********

विधान परिषद मतदानासाठी आज सायंकाळपासून दारुबंदी जाहीर

बुलडाणा दि‍.31 -अमरावती विभाग पदवीधर मतदारसंघ निवडणूक 2017 जाहीर झाली आहे. या निवडणूकीसाठी 3 फेब्रुवारी 2017 रोजी मतदान होणार आहे.  या निवडणूकीसाठी उद्या 1 फेब्रुवारी 2017 सायंकाळी 4 वाजेपासून दारूबंदी जाहीर करण्यात आली आहे.  त्याचप्रमाणे मतदानाचा अगोदरचा दिवस 2 फेब्रुवारी व मतदानाचा दिवस 3 फेब्रुवारी 2017 संपूर्ण दिवसाकरीता दारूबंदी जाहीर करण्यात आली आहे. त्यानुसार जिल्ह्यातील सीएल-3, एफएल-2, एफएल-3, एफएल-4  व एफएलबीआर-2 अनुज्ञप्त्या सर्व किरकोळ अनुज्ञप्त्या बंद राहणार आहे.

  या अनुज्ञप्त्या उपरोक्त तारखांना सुरू असल्यास त्यांचेविरूद्ध नियमानुसार पुढील योग्य ती कार्यवाही करण्यात येईल, असे जिल्हाधिकारी यांनी कळविले आहे.

                                                            ******

माहे जानेवारी 2017 चे  केरोसीन नि‍यतन जाहीर

बुलडाणा,दि.31 - माहे जानेवारी 2017  करीता  केरोसीन  नि‍यतन  वि‍तरीत करण्यात आले आहे. नियतनाप्रमाणे कोटा तालुक्याला देण्यात आलेला आहे. त्यानुसार शेगांव, नांदुरा, दे. राजा व चिखली तालुक्यातील डिलरसाठी भारत पेट्रोलीयमकरीता  एकुण 144 के.एल, अकोला, मलकापूर, चिखली व खामगांव येथील डिलरसाठी हिं‍दुस्थान पेट्रोलीयम करीता एकुण 312 के.एल आणि मलकापूर, मेहकर, नांदुरा, बुलडाणा व अकोला येथील डिलरसाठी इंडीयन ऑइल पेट्रोलीयमकरीता एकुण 228 के.एल, असे एकुण 684 के.एल. केरोसीनचे नि‍यतनाचा कोटा करण्यात आला आहे.

या कोट्याप्रमाणे तालुकानि‍हाय वाटप करण्यात आलेले नि‍यतन पुढीलप्रमाणे-

बुलडाणा 60, चि‍खली 96, दे राजा 48, मेहकर 66, लोणार 42, सि.‍ राजा 48, खामगाव 90, शेगाव 54, मलकापुर 36, मोताळा 60, नांदुरा 6, जळगाव जामोद 48 व संग्रामपुर 30 के.एल केरोसिनचे नियतन वितरीत करण्यात आले आहे, असे  जि‍ल्हा पुरवठा अधि‍कारी, बुलडाणा यांनी कळवि‍ले आहे.

                                        ******

शस्त्र परवान्यांची माहिती इलेक्ट्रॉनिक स्वरूपात तयार होणार

·        केंद्र सरकारकडून एनडीएएल विकसित

·        31 मार्च 2017 पूर्वी माहिती सादर करावी  

बुलडाणा,दि.31 - शस्त्र अधिनियम 1959 अंतर्गत 31 मार्च 2016 पूर्वी देण्यात आलेल्या सर्व शस्त्र परवान्यांची माहिती इलेक्ट्रॉनिक स्वरूपात तयार करण्यात येत आहे. त्यासाठी केंद्र सरकारने एनडीएल व्यवस्था विकसित केली आहे. यामध्ये माहिती 31 मार्च 2017 पूर्वी भरून युआयएन  क्रमांक शस्त्र परवानाधारकांनी प्राप्त करून घेणे आवश्यक आहे. त्यासाठी युआयएन प्राप्त असलेल्या शस्त्र परवानाधारकांनी 15 फेब्रुवारी 2017 पूर्वी उपविभागीय दंडाधिकारी अथवा जिल्हा दंडाधिकारी यांचे कार्यालयात संपर्क साधावा व आवश्यक माहिती उपलब्ध करून द्यावी. अशा शस्त्र परवानाधारकांना युआयएन प्राप्त करता येणार आहे.

    केंद्र शासनाने तयार केलेल्या एनडीएलमध्ये शस्त्र परवान्यांची माहिती इलेक्ट्रॉनिक स्वरूपात भरून युआयएन प्राप्त न केल्यास शस्त्र परवाना आपोआप रद्द होणार आहे. याची संपूर्ण जबाबदारी शस्त्र परवानाधारक यांची राहील, असे अप्पर जिल्हादंडाधिकारी यांनी कळविले आहे.

                                                                                    *****

जिल्हाधिकारी कार्यालयात होणारा लोकशाही दिन आचारसंहितेमुळे रद्द

  बुलडाणा, दि.31 : नागरिकांच्या तक्रारींचा निपटारा जलदगतीने व्हावा, यासाठी जिल्हाधिकारी कार्यालयात प्रत्येक महिन्याच्या पहिल्या सोमवारी आयोजित करण्यात येतो. मात्र फेब्रुवारी  महिन्याचा 6 फेब्रुवारी रोजी आयोजित केला जाणारा लोकशाही दिन स्थानिक स्वराज्य संस्था निवडणूकीची आचारसंहिता असल्यामुळे रद्द करण्यात आला आहे.  राज्य शासनाच्या 26 सप्टेंबर 2012 रोजीच्या परिपत्रकानुसार निवडणूकरीता आचार संहिता लागू करण्यात आलेली असल्यास त्या स्तरावरील लोकशाही दिनाचे आयोजन करता येत नाही. त्यानुसार फेब्रुवारी महिन्याच्या लोकशाही दिनाचे आयोजन होणार नाही. याची नागरिकांनी नोंद घ्यावी, असे आवाहन जिल्हाधिकारी कार्यालयाच्यावतीने करण्यात आले आहे.  

                                                        ******

मतिमंद व मानसिक संबधीत आज होणारे अपंग तपासणी बोर्ड रद्द

बुलडाणा, दि. 31 : सामान्य रूग्णालय, बुलडाणा येथे प्रत्येक महिन्याच्या पहिल्या बुधवारला मतिमंद व मानसिक संबधीत अपंग तपासणी बोर्ड आयोजित करण्यात येते. मात्र येथील मानसोपचारतज्ज्ञ रजेवर असल्यामुळे सदर बोर्ड उद्या 1 फेब्रुवारी 2017 रोजी घेतले जाणार नाही. तसेच नेत्र संबंधीत अपंग तपासणी बोर्ड नियमित सुरू राहणार आहे. तरी रूग्ण व नातेवाईक यांनी सदर अपंग तपासणी बोर्डास येवू नये. आल्यास झालेल्या गैरसोयीस प्रशासन जबाबदार राहणार नाही, असे जिल्हा शल्य चिकित्सक यांनी कळविले आहे. 

dpdc meeting news 7.1.2017

सन 2017-18 साठी 330.09 कोटी रूपयांचा प्रारूप आराखडा मंजूर

- पालकमंत्री

·            सर्वसाधारण योजनेसाठी 182.43 कोटी, अनुसूचित जाती उपयोजनेसाठी 123.57 कोटी

·                    आदिवासी उप योजनेसाठी 24.09 कोटी रूपये

·                    मुख्यमंत्री ग्रामसडक योजनेसाठी जिल्हा नियोजन मधून 15 टक्के निधीची तरतूद

·                    जिल्ह्यात समान निधीचे वितरण

·                    पूल वजा बंधारा करण्यासाठी नियोजन करावे

 

 बुलडाणा दि‍.7 -  सन 2017-18 करिता जिल्हा नियोजन समितीच्या माध्यमातून शासनाने घालून दिलेल्या वित्तीय मर्यादेत 330.09 कोटी रूपयांचा प्रारूप आराखडा तयार करण्यात आला आहे. सर्वसाधारण योजनेचा 182.43, अनुसूचित जाती उपयोजनेचा 123.57 व आदिवासी उपयोजनेसाठी 24.09 कोटी रूपयांचा त्यामध्ये समावेश आहे. जिल्हा नियोजन समितीच्या प्रारूप आराखड्याला शासनाकडून कपात न लागण्यासाठी प्रयत्न केल्या जाणार आहे. त्याचप्रमाणे सन 2016-17 वर्षाच्या पुनर्विनीयोजन प्रस्तावालाही मान्यता देण्यात येत आहे. समितीने प्रस्तावित केलेल्या आराखड्यामधून विकासाची व जनकल्याणाची कामे मोठ्या प्रमाणावर व्हावीत, अशी अपेक्षा राज्याचे कृषी तथा जिल्ह्याचे पालकमंत्री पांडुरंग फुंडकर यांनी आज व्यक्त केली.

   जिल्हा नियोजन समितीच्या बैठकीचे आयोजन आज जिल्हा नियोजन भवन येथे करण्यात आले होते. त्यावेळी ते बोलत होते. याप्रसंगी व्यासपीठावर खासदार प्रतापराव जाधव, जिल्हा परिषद अध्यक्षा श्रीमती अलकाताई खंडारे, अप्पर जिल्हाधिकारी शिवानंद टाकसाळे, अति. मुख्य कार्यकारी अधिकारी बी. बी नेमाने, जिल्हा नियोजन अधिकारी दिपक सिडाम आदी उपस्थित होते. तसेच सभागृहात आमदार सर्वश्री राहूल बोंद्रे, डॉ. संजय रायमूलकर, डॉ. शशीकांत खेडेकर, जि. प सभापती अंकुश वाघ, गणेश बस्‌सी आदींसह नियोजन समितीचे सदस्य उपस्थित होते.

     रस्ते विकासाला प्राधान्य देत शासनाने मुख्यमंत्री ग्रामसडक योजना कार्यान्वीत करण्यात आल्याचे सांगत पालकमंत्री पांडुरंग फुंडकर म्हणाले, या योजनेसाठी जिल्हा नियेाजन समितीमध्ये निधीची तरतूद करण्यात येणार आहे. या साठी नियोजनात 15 टक्के निधी ठेवण्यात आला आहे. यामुळे रस्त्यांचा विकास करण्यास निधीची कमतरता येणार नाही.  

    जिल्हा परिषद पशुसंवर्धन विभाग राबवित असलेल्या लाभार्थी अनुदान योजनेचा निधी लाभार्थ्यांच्या बँक खात्यात जमा करण्याच्या सूचना देत श्री. फुंडकर म्हणाले, अशा लाभार्थ्यांचे अनुदान बँकेने प्रलंबित ठेवू नये. लाभार्थ्यांच्या खात्यात थेट जमा करावे. तसेच बँकांनी शेतकऱ्यांच्या खात्यावर होल्ड लावू नये. रब्बी हंगामासाठी शेतकऱ्यांना बँक खात्यातील रक्कम उपयोगात आणता यावी. यादृष्टीने कार्यवाही करावी. विदर्भ सघन सिंचन विकास कार्यक्रमातंर्गत 200 कोटी रूपयांची मागणी करण्यात आली आहे. ही रक्कम प्राप्त झाल्यास पूर्वपरवानगी घेवून ठिबक सिंचन संच घेतलेल्या  जिल्ह्यातील ठिबक सिंचन अनुदानापासून वंचित शेतकऱ्यांना अनुदान देण्यात येईल.

    ते पुढे म्हणाले, आदिवासी किंवा वन गावांमध्ये विकास कामांसाठी जागेची मागणी आल्यास वनहक्के दावे तातडीने मंजूर करावे. त्यासाठी उपविभागीय स्तरावरील अधिकऱ्यांच्या बैठका घ्याव्यात.  जिल्हा नियोजन समितीच्या बैठकांना उपविभागीय अधिकारी यांनाही बोलवावे. सिंचन व दळणवळण असे दोन्ही उद्देश पूर्ण होत असलेल्या पूलवजा बंधाऱ्यांच्या कामांचे नियेाजन करावे. अशी कामे भौतिकदृष्ट्या तपासून घ्यावीत. यामुळे सिंचनही होईल आणि दळणवळणासाठी रस्त्याचे काम होईल. मेहकर व खामगांव येथील वाटप झालेल्या घरकूलांच्या गैरप्रकाराची चौकशी करावी. ही चौकशी त्रयस्थ संस्थेकडून करण्यात यावी.

      करडी संग्राहक प्रकल्पाच्या लिकेजबाबत पालकमंत्री म्हणाले, या तलावातील लिकेज बंद करण्याचे काम पाटबंधारे विभागाने त्वरित सुरू करावे. या प्रकल्पाच्या गोडबोले गेटमधून पाण्याची गळती होत असल्यास त्याबाबत त्वरित कार्यवाही करावी. ते पुढे म्हणाले, नगर पालिका शहरांजवळ असलेल्या त्रिशंकू भागाबाबत ग्रामपंचायत स्थापन करण्याची कार्यवाही करावी. अशाप्रकारच्या गावांसाठी तात्काळ नागरी सुविधा द्याव्यात. त्यासाठी स्वतंत्र बैठक बोलाविण्यात येईल. तसेच अपूर्णावस्थेत असलेल्या पाणीपुरवठा योजनांच्या पूर्णतेसाठीही बैठक आयोजित करणार असल्याचे यावेळी पालकमंत्री म्हणाले.

  खासदार प्रतापराव जाधव यावेळी म्हणाले, 2015-16 च्या खरीप हंगामातील दुष्काळ निधीपासून काही शेतकरी वंचित आहेत. त्यांना मदत मिळाली नाही. अशा गावांच्या निधीची मागणी प्रशासनाने केली आहे. मात्र सुरूवातीलाच या निधीची मागणी न करणाऱ्या कर्मचाऱ्यांवर कारवाई करावी. बँका शेतकऱ्यांना ‘कॅश क्रेडीट’ अंतर्गत पीक कर्ज देतात. त्यानुसार प्रत्येक वर्षी गहाण न घेता बँकांनी  बँकांनी शेतकऱ्यांशी व्यवहार करावा.

    यावेळी लोकप्रतिनिधींनी विविध समस्या माडल्या. या समस्यांवर पालकमंत्री यांनी संबंधित यंत्रणेकडून उपाययोजना करण्याच्या सूचना केल्या. बैठकीत जिल्हा नियोजन अधिकारी दिपक सिडाम यांनी सादरीकरण केले. आभार अप्पर जिल्हाधिकारी शिवानंद टाकसाळे यांनी मानले. बैठकीला जिल्हा नियोजन समितीचे सदस्य, विभागप्रमुख, विविध विभागांचे अधिकारी, कर्मचारी आदींची उपस्थिती होती.