DIO BULDANA NEWS 31.08.2023

 आयुष्मान भव मोहिमेत आबालवृध्दांची आरोग्य तपासणी

*लाभ घेण्याचे जिल्हा प्रशासनाचे आवाहन

बुलडाणा, दि. 31 : जिल्ह्यात 1 सप्टेंबर ते 31 डिसेंबर 2023 दरम्यान आयुष्मान भव आरोग्य मोहीम राबविण्यात येणार आहे. यात जिल्ह्यातील सर्व वयोगटातील नागरीकांना दर्जेदार आरोग्य सुविधा देण्यासाठी या मोहिमेंतर्गत आबालवृद्धांची आरोग्यविषयक तपासणी करण्यात येणार आहे. या मोहिमेचा लाभ घ्यावा, असे आवाहन जिल्हा प्रशासनाने केले आहे.

आयुष्मान आपल्या दारी ३.० या मोहिमेमध्ये जिल्ह्यातील सर्व पात्र लाभार्थ्यांची नोंदणी करून आयुष्मान कार्डाचे वितरण करण्यात येणार आहे. आयुष्मान सभा उपक्रमामध्ये आरोग्य विषयक सेवासुविधांची जनजागृती करण्यासाठी ग्रामपंचायतीच्या सहकार्याने मेळावे घेण्यात येणार आहे. आयुष्मान कार्ड आणि आभा कार्डबाबत आरोग्यवर्धिनी केंद्रामार्फत जनजागृती करण्यात येणार आहे. यात असंसर्गजन्य रोग, सिकलसेल, लसीकरण आणि क्षयरोगाबाबत जनजागृती करण्यात येणार आहे. आयुष्मान मेळाव्यांतर्गत मधुमेह, ताणतणाव, रक्तदाब, विविध प्रकारचे कॅन्सर, कुष्ठरोग, क्षयरोग, कुपोषण, नेत्रचिकित्सा आदीबाबत जनजागृती करणे आणि आयुष्मान भारत आरोग्य वर्धिनी केंद्रस्तरावर दर आठवड्याला सलग चार आठवडे तपासणी करण्यात येणार आहे.

या मोहिमेदरम्यान आयुष्मान कार्ड आणि आभा कार्ड तयार करणे, सर्व समावेशक आरोग्य सेवा, आयुष, मानसिक आरोग्य, वाढत्या वयातील आजार, परिहारक उपचार, मौखिक आरोग्य, नेत्र, कान, नाक व घसा यांचे आरोग्य, समुपदेशन सेवा तसेच योगा, वेलनेस उपक्रम, मोफत औषधी, प्रयोगशाळा तपासणी व टेलीकन्सलटेशन सेवा देण्यात येणार आहेत.

जिल्ह्यातील सर्व अंगणवाडीतील मुले आणि प्राथमिक शाळेतील मुलांची आरोग्यविषयक तपासणी या मोहिमेदरम्यान करण्यात येणार आहे. या मोहिमेंतर्गत मुलांची ३२ सामान्य आजारांची तपासणी आणि उपचार करण्यात येणार आहे. आवश्यकता भासल्यास मुलांवर जिल्हा ठिकाणी शस्त्रक्रीया करण्यात येणार आहे. त्यांना आवश्यक उपयुक्त साहित्यही देण्यात येणार आहे. आयुष्मान भव मोहिमेचा जिल्ह्यातील नागरीकांनी लाभ घ्यावा, असे आवाहन जिल्हा प्रशासनाने केले आहे.

00000

जिल्हा क्रीडा कार्यालयात राष्ट्रीय क्रीडा दिन साजरा

बुलडाणा, दि. 31 : राज्यातील क्रीडा संस्कृतीची जोपासना आणि जनतेमध्ये क्रीडा वातावरण निर्माण होण्याच्या दृष्टीने हॉकीचे जादुगर स्व. मेजर ध्यानचंद यांचा जन्मदिवस जिल्हा क्रीडा कार्यालयातर्फे सहकार विद्या मंदिरात राष्ट्रीय क्रीडा दिन म्हणून साजरा करण्यात आला.

यावेळी आमदार संजय गायकवाड, डॉ. सुकेश झंवर, श्री शिवछत्रपती क्रीडा पुरस्कारप्राप्त अनुराधा सोळंकी, एकविध खेळ संघटनेचे प्रतिनिधी जयसिंग जयवार, उर्दू हायस्कूलचे प्राचार्य श्री. दाऊद, कुणाल गायकवाड आदी उपस्थित होते.

जिल्हा क्रीडा अधिकारी लक्ष्मीशंकर यादव यांनी प्रास्ताविक केले. यावेळी अनुराधा सोळंकी मनोगत व्यक्त केले. कार्यक्रमात आंतरराष्ट्रीय आर्चरी खेळाडू प्रथमेश जवकार यांच्या वतीने वडील समाधान जवकार यांनी सत्कार स्विकारला. आंतरराष्ट्रीय खेळाडू मानव गणेश जाधव यांचा सत्कार करण्यात आला.

जिल्ह्यात सन 2022-23 या वर्षात शासनमान्य शाळा, विद्यालय, कनिष्ठ महाविद्यालयातील खेळाडू विद्यार्थ्यांनी, जिल्हा क्रीडा अधिकारी कार्यालयामार्फत आयोजित जिल्हास्तर शालेय विविध क्रीडा स्पर्धांमध्ये सहभागी होऊन उच्चतम गुण प्राप्त केले आहेत, अशा 14 वर्षे मुले व मुली या वयोगटातून प्रथम सहकार विद्या मंदिर, बुलडाणा, द्वितीय यशोधाम पब्लिक स्कूल, मलकापूर, तृतीय आदर्श विद्यालय, चिखली, 17 वर्षे मुले व मुली या वयोगटातून सेठ काशीराम कळस्कर विद्यालय, निमगाव, ता. नांदुरा, द्वितीय सहकार विद्या मंदिर, बुलढाणा, तृतीय स्कूल ऑफ स्कॉलर्स, मलकापूर, 19 वर्षे मुले व मुली या वयोगटातून प्रथम राजमाता जिजाऊ मुलींची सैनिकी शाळा, चांधई, ता. चिखली, द्वितीय नुतन इंग्लिश स्कूल, मलकापूर, तृतीय जी. एस. सायन्स आणि आर्ट कॉलेज, खामगाव यांची निवड गुणांकनाद्वारे करण्यात आली. या शाळांना प्रोत्साहनापर रक्कम प्रदान करण्यात आली. सन 2022-23 या वर्षात विविध गट आणि राष्ट्रीय क्रीडा स्पर्धेमध्ये सहभागी प्राविण्यप्राप्त 110 खेळाडूचा स्मृतीचिन्ह, प्रमाणपत्र देऊन गौरविण्यात आले,

00000

विशेष गौरव पुरस्कारासाठी अर्ज करावेत

*जिल्हा सैनिक कल्याण कार्यालयाचे आवाहन

बुलडाणा, दि. ३१ : विविध क्षेत्रात अतिउत्कृष्ट कार्य करणाऱ्या माजी सैनिक, पत्नी अथवा पाल्यांना राष्ट्रीय स्तरासाठी एकरकमी 10 हजार आणि आंतरराष्ट्रीय स्तरासाठी 25 हजार रुपयांचा विशेष गौरव पुरस्कार देण्यात येतो. या पुरस्कारासाठी माजी सैनिक, पत्नी अथवा पाल्यांपैकी पात्र उमेदवारांनी जिल्हा सैनिक कल्याण कार्यालयात 20 सप्टेंबर 2023 पर्यंत अर्ज सादर करावेत, असे आवाहन जिल्हा सैनिक कार्यालयाने केले आहे.

यात पुरस्कारासाठी राष्ट्रीय, आंतरराष्ट्रीय पातळीवर खेळातील पुरस्कार प्राप्त खेळाडू, साहित्य, संगीत, गायन, वादन, नृत्य आदी क्षेत्रातील पुरस्कार विजेते, यशस्वी उद्योजकांचा पुरस्कारप्राप्त, संगणक क्षेत्रात अति उत्कृष्ट कामगिरी करणारे, पूर, जळीत, दरोडा, अपघात व इतर नैसर्गिक आपत्तींमध्ये बहुमोल कामगिरी करणारे, तसेच देश, राज्याची प्रतिष्ठा वाढवतील अशा स्वरूपाचे लक्षणीय काम करणारे माजी सैनिक, पत्नी अथवा पाल्यांना अशा कार्याबद्दल राष्ट्रीयस्तरावर 10 हजार आणि आंतरराष्ट्रीय स्तरावर 25 हजार रूपयांचा पुरस्कार, शाल, श्रीफळ व सन्मान चिन्ह व प्रशस्तीपत्र देण्यात येते. पात्र उमेदवारांनी यासाठी अर्ज सादर करावेत, असे आवाहन जिल्हा सैनिक कल्याण अधिकारी स्कॉड्रन लिडर रूपाली सरोदे यांनी केले आहे.

00000

पारधी, फासेपारधींना व्यवसायासाठी अनुदान

बुलडाणा, दि. 31 : प्रकल्प अधिकारी, एकात्मिक आदिवासी विकास प्रकल्प, अकोला यांच्या कार्यक्षेत्रातील जिल्ह्यातील जिल्हा वार्षिक आदिवासी घटक कार्यक्रम योजनेंतर्गत सन 2022-23 या वर्षात पारधी समाजाच्या विकासासाठी विविध योजना राबविण्यात येणार आहे. यात पारधी, फासेपारधी समाजाच्या लाभार्थ्यांनी दि. 15 सप्टेंबर 2023 पर्यंत अर्ज करावेत, असे आवाहन करण्यात आले आहे.

सदर योजनेसाठी कार्यालयीन कामकाजाच्या दिवशी योजनेचे छापील अर्ज दि. 14 सप्टेंबर 2023 पर्यंत लाभार्थ्यांना विनामूल्य देण्यात येईल. योजना ही पारधी, फासेपारधी समाजाच्या महिला लाभार्थ्यांना 100 टक्के अनुदानावर मनीमाळ व्यवसाय करण्यासाठी 20 लाभार्थींना अर्थसहाय्य, पारधी, फासेपारधी समाजातील लाभार्थ्यांना वाघरी मटन टपरी व्यवसाय करण्यासाठी 100 टक्के अनुदानावर 20 लाभार्थ्यांना अर्थसहाय्य करण्यात येणार आहे. अर्जासोबत अर्जदाराने पारधी, फासेपारधी जमातीचा दाखला प्रमाणपत्र, आधार कार्ड, बँक खाते क्रमांक, दारिद्र्यरेषेखाली असल्यास प्रमाणपत्र, तहसिलदाराचा उत्पन्नाचा दाखला, रहिवाशी दाखला, रेशनकार्ड, विधवा असल्यास पतीचे मृत्यू प्रमाणपत्र, दिव्यांग असल्यास प्रमाणपत्र, परितक्त्या असल्यास पुरावा, शैक्षणिक पात्रतेसाठी शाळा सोडल्याचा दाखला, पासपोर्ट आकाराचे 2 फोटो सादर करावे, असे आवाहन एकात्मिक आदिवासी विकास प्रकल्प कार्यालयाचे प्रकल्प अधिकारी यांनी केले आहे.

00000

गणेशोत्सवात जादूटोणा विरोधी देखावा करण्याचे आवाहन

बुलडाणा, दि. 31 : येत्या काळात गणेशोत्सव आणि दुर्गोत्सव साजरा करण्यात येणार आहे. या उत्सवाच्या काळात मंडळांनी जादूटोणा विरोधी देखावे करावेत, असे आवाहन समाज कल्याण विभागातर्फे करण्यात आले आहे.

भारतीय समाजात रूजलेल्या अनिष्ठ प्रथांमुळे समाजाचे नुकसान झाले आहे. हे प्रकार थांबविण्यासाठी महाराष्ट्र नरबळी आणि इतर अमानुष, अनिष्‍ट व अघोरी प्रथा व जादूटोणा यांना प्रतिबंध घालण्यासाठी व या प्रथांचे समूळ उच्चाटन करण्यासाठी अधिनियम जारी करण्यात आला आहे. जादूटोणा विरोधी कायद्याची जनजागृती, प्रचार आणि प्रसार कार्यक्रम अंमलबजावणी करण्यासाठी जिल्ह्यातील गणेश मंडळ, तसेच देवी मंडळांनी पोस्टर, चित्र, त्याअनुषंगाने देखावे निर्माण करावे, असे आवाहन समाज कल्याण सहायक आयुक्त डॉ. अनिता राठोड यांनी केले आहे.

000000

सोमवारी लोकशाही दिनाचे आयोजन

बुलडाणा, दि. 31 : दर महिन्यात जिल्हास्तरीय लोकशाही दिनाचे आयोजन करण्यात येते. सप्टेंबर 2023 महिन्याचा लोकशाही दिन सोमवार, दि. 4 सप्टेंबर   2023 रोजी दुपारी 1 वाजता जिल्हाधिकारी कार्यालयात आयोजित करण्यात आला आहे.

तक्रारदारांनी लोकशाही दिनी उपस्थित राहावे, उपस्थित राहणे शक्य नसल्यास तक्रारी रजिस्टर पोस्टाने लोकशाही दिनाआधी जिल्हाधिकारी कार्यालयात पोहोचतील अशाप्रकारे पाठवावेत, असे निवासी उपजिल्हाधिकारी सदाशिव शेलार यांनी कळविले आहे.

00000

अंगणवाडी मदतनीसांची गुणवत्ता यादी प्रसिद्ध

बुलडाणा, दि. 31 : बाल विकास प्रकल्प अधिकारी कार्यालयातर्फे अंगणवाडी मदतनीसांची भरती करण्यात येणार आहे. यासाठी अर्जाची छाननी पूर्ण करण्यात आली असून अंतिम गुणवत्तायादी प्रसिद्ध करण्यात आली आहे.

बाल विकास प्रकल्प अधिकारी (नागरी) प्रकल्प, बुलडाणा (उत्तर) मलकापूर अंतर्गत शेगाव, नांदूरा, जळगाव जामोद, मलकापूर, मोताळा, संग्रामपूर आणि बाल विकास प्रकल्प अधिकारी नागरी प्रकल्प, बुलडाणा दक्षिण या प्रकल्पामध्ये बुलडाणा, चिखली, मेहकर, देऊळगाव राजा, सिंदखेड राजा, लोणार, खामगाव नगर परिषद क्षेत्रातील अंगणवाडी केंद्राच्या मदतनीस पदांची अर्जाची अंतिम तपासणी पूर्ण झाली आहे. प्राथमिक गुणवत्तायादी दोन्ही कार्यालय, तसेच नगर परिषद कार्यालयाच्या नोटीस बोर्डावर प्रसिद्ध करण्यात आली आहे. सदर भरती प्रक्रिया शासन निर्णयानुसार पार पाडण्यात येत आहे. पात्र उमेदवारांनी कोणत्याही भूल, थापा अथवा अमिषाला बळी पडू नये, असे आवाहन बाल विकास प्रकल्प अधिकारी मं. मा. पांचाळ यांनी केले आहे.

00000

गणेशोत्सव स्पर्धेत जास्तीत जास्त मंडळांनी

15 सप्टेंबरपर्यंत सहभाग नोंदवावा

*सांस्कृतिक कार्य मंत्री सुधीर मुनगंटीवार यांचे आवाहन

मुंबई, दि. 31 : राज्य शासनाने १९ सप्टेंबर २०२३ पासून सुरू होणाऱ्या गणेशोत्सवात राज्यातील उत्कृष्ट सार्वजनिक गणेशोत्सव मंडळांना पुरस्कार देण्याचा निर्णय घेतला आहे. या स्पर्धेत जास्तीत जास्त मंडळांनी १५ सप्टेंबर २०२३ पर्यंत आपला सहभाग नोंदवावा, असे आवाहन सांस्कृतिक कार्य मंत्री सुधीर मुनगंटीवार यांनी केले आहे.

            या स्पर्धेसाठी मुंबई, मुंबई उपनगर, पुणे, ठाणे या जिल्ह्यांतून प्रत्येकी ३ व अन्य जिल्ह्यांतून प्रत्येकी एक या प्रमाणे उत्कृष्ट ४४ गणेशोत्सव मंडळांची निवड करण्यात येईल. या ४४ गणेशोत्सव मंडळांमधून राज्यातील पहिल्या क्रमांकाच्या उत्कृष्ट गणेशोत्सव मंडळास पाच लाख रुपयांचे, द्वितीय क्रमांकास अडीच लाख रुपयांचे, तर तृतीय क्रमांकास एक लाख रुपयांचे पारितोषिक व प्रमाणपत्र देऊन गौरविण्यात येईल. उर्वरित ४१ गणेशोत्सव मंडळांना राज्य शासनाकडून प्रत्येकी २५ हजार रुपयांचे पारितोषिक व प्रमाणपत्र देण्यात येईल.

उत्कृष्ट सार्वजनिक गणेशोत्सव स्पर्धेचे वेळापत्रक

            उत्कृष्ट सार्वजनिक गणेशोत्सव स्पर्धेत सहभागी होण्यासाठी गणेश मंडळांना 15 सप्टेंबर 2023 पर्यंत स्पर्धेत अर्ज करता येईल. mahotsav.plda.@gmail.com या ई - मेलवर गणेशमंडळांनी अर्ज करावा. पु. ल. देशपांडे कला अकादमी तर्फे ई-मेलवर प्राप्त अर्ज संबंधित जिल्हाधिकारी कार्यालयाला १८ सप्टेंबरपर्यंत परीक्षणासाठी उपलब्ध करून देण्यात येईल. १९ ते २८ सप्टेंबर दरम्यान जिल्हास्तरीय समितीचे सदस्य स्पर्धेत सहभागी गणेशोत्सव मंडळांचे प्रत्यक्ष भेटी देऊन परीक्षण करतील. व्हिडिओग्राफी आणि कागदपत्रे तपासून अभिप्रायासह गुणांकन करतील. जिल्हास्तरीय समिती जिल्ह्यातून एका उत्कृष्ट गणेश मंडळाची शिफारस १ ऑक्टोबरपर्यंत पु. ल. देशपांडे महाराष्ट्र कला अकादमीला करेल. राज्यस्तरीय समिती राज्यातील उत्कृष्ट ३ गणेश मंडळाची शिफारस अकादमीला करेल. त्यानुसार कला अकादमी विजेत्या मंडळांची घोषणा करेल व १२ ऑक्टोबरला विजेत्या गणेश मंडळांना पुरस्कार प्रदान करण्यात येईल. 

            राज्य शासनाच्या www.maharashtra.gov.in या संकेतस्थळावरील पर्यटन व सांस्कृतिक कार्य विभागाच्या ४ जुलै २०२३ रोजीच्या शासन निर्णयात स्पर्धेचा तपशील, स्पर्धा निवडीचे निकष नमूद केले आहेत. तसेच अर्जही उपलब्ध करून देण्यात आला आहे. अर्जाच्या या नमुन्यानुसार सार्वजनिक गणेशोत्सव मंडळांनी पु. ल. देशपांडे, महाराष्ट्र कला अकादमी, मुंबई यांच्या mahotsav.plda@gmail.com या ई- मेल १५ सप्टेंबर २०२३ पर्यंत अर्ज करावा. या स्पर्धेत जास्तीत जास्त मंडळांनी सहभाग नोंदवावा, असेही आवाहन सांस्कृतिक कार्य मंत्री श्री. मुनगंटीवार यांनी केले आहे.

०००००

DIO BULDANA NEWS 29.08.2023

 खरीप हंगाम पिकस्पर्धेत सहभागी होण्याची अंतिम मुदत 31 ऑगस्ट

शेतकऱ्यांना सहभागी होण्याचे आवाहन

बुलडाणा, दि. 29 : जिल्ह्यात पिकांची उत्पादकता वाढविण्यासाठी शेतकऱ्यांकडून विविध प्रयोग करण्यात येतात. अशा प्रयोगशील शेतकऱ्यांना मिळालेल्या उत्पादकतेबाबत प्रोत्साहन देऊन विजेत्या शेतकऱ्यांचा गौरव व्हावा, यासाठी पिक स्पर्धा खरीप हंगाम 2023 मध्ये शेतकऱ्यांनी सहभागी व्हावे, असे आवाहन आयुक्त कृषी सुनील चव्हाण यांनी केले आहे.

कृषी विभागामार्फत खरीप हंगाम सन 2023 मध्ये सर्वसाधारण व आदिवासी गटासाठी भात, ज्वारी, बाजरी, मका, नाचणी (रागी), तूर, मूग, उडीद, सोयाबीन, भुईमुग, सुर्यफुल या 11 पिकांसाठी पिक स्पर्धेचे आयोजन करण्यात आले आहे.

पीकस्पर्धेसाठी भात, ज्वारी, बाजरी, मका, नाचणी (रागी), तूर, सोयाबीन, भुईमुग व सुर्यफुल या पिकांसाठी अर्ज दाखल करण्याची अंतिम तारीख 31 ऑगस्ट आहे. स्पर्धेसाठी प्रवेश शुल्क प्रत्येक पिकासाठी स्वतंत्र सर्वसाधारण गटासाठी रक्कम 300 रुपये व आदिवासी गटासाठी रक्कम 150 रुपये आहे. स्पर्धेत भाग घेण्‍यासाठी शेतकऱ्याकडे स्‍वतःच्‍या नावावर जमीन असणे व ती जमीन तो स्वत: कसत असणे आवश्‍यक आहे.

स्पर्धेत भाग घेणाऱ्या शेतकऱ्याला एकाच वेळी एकापेक्षा जास्त पिकांसाठी स्पर्धेत सहभाग घेता येईल. पिक स्पर्धेमध्ये सहभाग घेण्याकरिता स्पर्धकास स्वतःच्या शेतावर स्पर्धेसाठी सहभाग घेऊ इच्छिणाऱ्या पिकाची  भात पिकाच्या बाबतीत किमान 20 आर व इतर पिकांच्या बाबतीत किमान 40 आर (1 एकर) क्षेत्रावर सलग लागवड असणे आवश्यक आहे. पिकस्पर्धा तालुकास्तरावर आयोजित करण्यात येणार असून सर्वसाधारण व आदिवासी गटासाठी तालुकास्तरावरील पिकस्पर्धेमध्ये सहभाग घेऊन शेतक-यांची आलेली उत्पादकता आधारभूत धरून राज्य, जिल्हा व तालुका स्तरावरील स्पर्धेसाठी विजेत्या शेतकऱ्यांची निवड करण्यात येणार आहे.

अर्जासोबत विहित नमुन्यातील अर्ज (प्रपत्र-अ), ठरवून दिलेले प्रवेश शुल्क भरल्याचे चलन,  7/12, 8-अ चा उतारा, जात प्रमाणपत्र (केवळ आदिवासी असल्यास), पिकस्पर्धेसाठी शेतकऱ्याने संबंधित 7/12 वरील घोषित केलेल्या क्षेत्राचा चिन्हांकित केलेला नकाशा, बँक खाते चेक, पासबुकच्या पहिल्या पानाची छायांकित प्रत ही कागदपत्रे जोडावी लागणार आहे.

पिकस्पर्धा बक्षिसाचे स्वरूप हे सर्वसाधारण व आदिवासी गटातील शेतकऱ्यांसाठी राज्य, जिल्हा व तालुका पातळीवरील पीकनिहाय प्रथम, द्वितीय व तृतीय क्रमांकाची बक्षीस रक्कम ही तालुका पातळीवर पहिले बक्षीस 5 हजार रूपये, दुसरे बक्षीस तीन हजार रूपये, तिसरे बक्षीस 2 हजार रूपये, जिल्हा पातळीवर पहिले बक्षीस 10 हजार रूपये, दुसरे बक्षिस 7 हजार रूपये, तिसरे बक्षीस 5 हजार रूपये, तसेच राज्यपातळीवर पहिले बक्षीस 50 हजार रूपये, दुसरे बक्षिस 40 हजार रूपये व तिसरे  बक्षीस 30 हजार रूपये याप्रमाणे आहे.

खरीप हंगाम सन 2023 पिकस्पर्धेसाठी शेतकऱ्यांनी सहभागी व्हावे, असे आवाहन कृषी आयुक्त सुनील चव्हाण यांनी केले आहे. या योजनेबाबत अधिक माहितीसाठी कृषी विभागाचे संकेतस्थळ krishi.maharashtra.gov.in किंवा संबंधित तालुका कृषी अधिकारी कार्यालयाशी संपर्क साधावा, असे कळविण्यात आले आहे.

00000

DIO BULDANA NEWS 28.08.202

 नेहरू युवा केंद्राचा जिल्हास्तरीय युवा उत्सवाची सांगता

बुलडाणा, दि. 28 : नेहरु युवा केंद्र आणि सहकार विद्या मंदिर यांच्या सहकार्याने जिल्हास्तरीय युवा उत्सव शनिवार, 26 ऑगस्ट रोजी सहकार ऑडीटोरीयम येथे थाटात पार पडला. उत्सवाचे उद्घाटन आमदार संजय गायकवाड यांच्या हस्ते झाले.

अप्पर जिल्हाधिकारी दिनेश गीते अध्यक्षस्थानी होते. प्रमुख पाहुणे म्हणून डॉ. सुकेश झंवर, मृत्यूंजय गायकवाड, ओमसिंग राजपूत, गजेंद्र दांडगे, प्रा. हरीश साखरे, राष्ट्रीय सेवा योजना कार्यक्रम अधिकारी प्रा. ज्ञानोबा कांदे, प्रा. सागर गवई, प्रा. डॉ. नंदकिशोर बोकाडे, प्रा. निता बोचे उपस्थित होते.

आमदार श्री. गायकवाड म्हणाले, शहर सुंदर, स्वच्छ निर्माण करण्याचा संकल्प करण्यात आला आहे. झोपडपट्टीतील सामान्यवर्गातील 300 मुलांसाठी यावर्षीपासून सीबीएससी शिक्षण सुरु केले आहे. युवकांनी जात-पात-धर्म यापलिकडे जाऊन मानवता धर्म जोपासावा, असे आवाहन करून युवकांमधील सुप्त कलागुणांना वाव देण्यासाठी नेहरू युवा केंद्राने घेतलेल्या युवा उत्सवाचे कौतुक केले. अप्पर जिल्हाधिकारी श्री. गीते यांनी राष्ट्रीय विकासाच्या कार्यात तरुणांनी पुढाकार घ्यावा. तसेच 18 वर्षावरील तरुणांनी मतदार यादीमध्ये नाव नोंदवावे. तसेच युवकांनी व्यसनाधिनतेपासून दूर रहावे, जीवनात यशस्वीतेसाठी ध्येय निश्चित करावे, असे आवाहन केले.

जिल्हास्तरीय युवा उत्सवात चित्रकला, कविता लेखन, छायाचित्र, भाषण आणि सांस्कृतिक कार्यक्रमाच्या स्पर्धा घेण्यात आल्या. या स्पर्धांचे बक्षीस वितरण नायब तहसिलदार श्री. पवार, जिल्हा युवा अधिकारी प्रणित सांगवीकर यांनी केले. भाषण स्पर्धेत प्रथम सायर शेख, द्वितीय ओमप्रकाश गवई, तृतीय धनश्री टेकाळे यांनी पटकविला. मोबाईल छायाचित्र स्पर्धेमध्ये प्रथम मयूर सोनुने, द्वितीय हर्षल तायडे, तृतीय ऋतूराज बोकाडे, प्रोत्साहनपर प्रगती झनके यांनी पटकविला. कविता लेखन स्पर्धेमध्ये प्रथम नेहा धंदर, द्वितीय वेदांत बोबडे, तृतीय क्रमांक देवानंद रावणचवरे यांनी पटकविला. चित्रकला, पोस्टर स्पर्धेत प्रथम शाम रत्नपारखी, द्वितीय समर्थ जोशी, तृतीय उर्वी कथने, प्रोत्साहनपर गौरी उमाळे यांनी पटकावला. सांस्कृतिक कार्यक्रमात प्रथम फोक आर्टीस्ट बुलडाणा, द्वितीय स्व. भास्करराव शिंगणे कला महाविद्यालय साखरखेर्डा, तृतीय एएसपीएम महाविद्यालय, बुलडाणा यांनी पटकावला.

रणजितसिंग राजपूत यांनी सूत्रसंचालन केले. लेखा व कार्यक्रम पर्यवेक्षक अजयसिंग राजपूत यांनी आभार केले. कार्यक्रमासाठी धनंजय चाफेकर, महेंद्र सौभागे, विलास सोनोने, राष्ट्रीय युवा स्वयंसेवक सुमित वाकोडे, सुरज बोरसे, उमेश बावस्कर, राहूल पवनकार, विनायक खरात, शिवाजी हावरे, देवानंद नागरे, वैभव नालट, शितल मुंढे, संतोष गवळी यांनी पुढाकार घेतला.

00000

माध्यमिक शाळा, कनिष्ठ महाविद्यालयांना प्रोत्साहनात्मक अनुदान वितरीत

बुलडाणा, दि. 28 : भारतीय शालेय खेळ महासंघाद्वारे पुरस्कृत राज्य शासनाकडून आयोजित शालेय क्रीडा स्पर्धेतील जिल्हास्तरावर 14, 17, 19 वर्षे वयोगटाखालील क्रीडा स्पर्धेत सहभागी होणाऱ्या शाळा, वरिष्ठ महाविद्यालय, संलग्न कनिष्‍ठ महाविद्यालयांना प्रोत्साहनात्मक अनुदान वितरीत करण्यात आले आहे.

गुणांकनाकरीता सर्व खेळांच्या सांघिक जिल्हास्तरीय विजयी संघाला 10 गुण, उपविजयी संघास 7 गुण आणि तृतिय क्रमांकाच्या संघाला 5 गुण तर वैयक्तिक क्रीडा स्पर्धांतील जिल्हास्तरीय स्पर्धेची सर्वसाधारण विजेतेपद निश्चित करुन प्रथम क्रमांकास 10 गुण, द्वितीय क्रमांकास 7 गुण, तृतीय क्रमांकास 5 गुण देण्यात येतात. जिल्हास्तरीय शालेय क्रीडा स्पर्धेतील पदक विजेती शाळांना प्रोत्साहनात्मक अनुदान 14, 17, 19 वर्षाखालील प्रथम क्रमांकरीता 1 लाख रुपये, द्वितीय क्रमांकाकरीता 75 हजार रुपये, तृतिय क्रमांकाकरीता 50 हजार रुपये वितरित करण्यात येते.

सन 2022-23 या वर्षात बुलडाणा जिल्ह्यातील शासनमान्य शाळा, विद्यालय, कनिष्ठ महाविद्यालयातील खेळाडू विद्यार्थ्यांनी जिल्हा क्रीडा अधिकारी कार्यालयामार्फत आयोजित जिल्हास्तर शालेय विविध क्रीडा स्पर्धांमध्ये सहभाग घेऊन उच्चतम गुण प्राप्त केले आहेत. 14 वर्षे मुले व मुली या वयोगटातून प्रथम सहकार विद्या मंदिर, सीबीएसई, बुलडाणा, द्वितीय यशोधाम पब्लिक स्कूल, मलकापूर, तृतिय आदर्श विद्यालय, चिखली. 17 वर्षे मुले व मुली या वयोगटातून सेठ काशीराम कळस्कर विद्यालय, निमगाव, ता. नांदुरा, द्वितीय सहकार विद्या मंदिर, सीबीएसई बुलडाणा, तृतिय स्कूल ऑफ स्कॉलर्स, मलकापूर. 19 वर्षे मुले आणि मुली या वयोगटातून प्रथम राजमाता जिजाऊ मुलींची सैनिकी शाळा, चांधई ता. चिखली, द्वितीय नुतन इंग्लिश स्कूल, मलकापूर, तृतिय जी. एस. सायन्स आणि आर्ट कॉलेज, खामगाव यांची निवड गुणांकनाद्वारे करण्यात आली आहे.

या शाळा, महाविद्यालयांना राष्ट्रीय क्रीडा दिनी दि. 29 ऑगस्ट 2023 रोजी सकाळी 10 वाजता सहकार विद्या मंदिर येथे होणाऱ्या कार्यक्रमात प्रोत्साहनात्मक अनुदानाचे वितरण करुन गौरविण्यात येणार आहे, असे जिल्हा क्रीडा अधिकारी गणेश जाधव यांनी कळविले आहे.

00000

बुधवारचे दिव्यांग तपासणी शिबीर रद्द

बुलडाणा, दि. 28 : जिल्हा रूग्णालयात नियमितपणे दिव्यांग तपासणी शिबीर घेण्यात येते. मात्र बुधवार, दि. 30 ऑगस्ट 2023 रोजी तपासणीच्या दिवशी सार्वजनिक सुट्टी असल्यामुळे शिबीर रद्द करण्यात आले आहे.

जिल्हा रुग्णालयात नियमितपणे प्रत्येक बुधवारी अस्थीव्यंग संबंधित दिव्यांग बोर्ड सुरू असते. मात्र बुधवार, दि. 30 ऑगस्ट 2023 रोजी नारळी पौर्णिमेनिमित्त स्थानिक सुट्टी असल्यामुळे या दिवसाचे दिव्यांग तपासणी शिबीर रद्द करण्यात आले आहे. त्यामुळे जिल्ह्यातील नागरिकांनी तपासणीसाठी येऊ नये, असे आवाहन जिल्हा शल्य चिकित्सक यांनी केले आहे.  

00000

उद्योजकता विकास केंद्रातर्फे शेळी, कुक्कुट, पशूपालन प्रशिक्षण

बुलडाणा, दि. 28 : महाराष्ट्र उद्योजकता विकास केंद्राच्या जिल्हा उद्योग केंद्रातर्फे उद्योग व्यवसाय सुरु करु इच्छिणाऱ्या सुशिक्षीत बेरोजगार युवक, युवतींसाठी बुलडाणा येथे शेळीपालन, कुक्कुट आणि गाय, म्हैस पालन प्रशिक्षण कार्यक्रम आयोजित करण्यात आला आहे. हे प्रशिक्षण दि. 4 ते 8 सप्टेंबर 2023 या कालावधीत होणार आहे.

सदर प्रशिक्षण सुशिक्षित बेरोजगार युवकांनी तंत्रशुद्ध प्रशिक्षण घेऊन स्वत:चा उद्योग, व्यवसाय सुरु करावा, यासाठी देण्यात येणार आहे. या प्रशिक्षणात शेळी, कुक्कुट आणि गाय, म्हैस पालनाचे तंत्र आणि प्रकार, त्यांच्या जाती, लसीकरण, संशोधन रोग आणि लक्षणे, निर्मिती व चाऱ्याचे प्रकार आणि उद्योग सुरु करण्यासाठी संपुर्ण सहकार्य करण्यात येणार आहे. त्यासोबतच उद्योजकता विकास, उद्योग संधी, मार्गदर्शन, शासकीय योजनांची माहिती प्रशिक्षणात तज्‍ज्ञ व्यक्ती करणार आहेत. प्रशिक्षणात प्रवेश घेऊ इच्छिणारा उमेदवार हा किमान पाचवी पास, वय 18 ते 50 वर्षे असावे. प्रशिक्षण यशस्वीपणे पुर्ण केल्यानंतर प्रमाणपत्र दिल्या जाणार आहे. प्रशिक्षण नोंदणीसाठी दि. 4 सप्टेंबर 2023 पर्यंत कार्यालयीन वेळेत प्रकल्प अधिकारी गणेश गुप्ता, महाराष्ट्र उद्योजकता विकास केंद्र, द्वारा जिल्हा उद्योग केंद्र, दूरदर्शन केंद्रासमोर, मलकापूर रोड, बुलडाणा, मोबाईल नंबर 8275093201 / 9011578854 यांच्याशी संपर्क साधावा, असे आवाहन विभागीय अधिकारी प्रदिप इंगळे यांनी केले आहे.

00000

दिव्यांग व्यक्तींनी वैश्विक ओळखपत्रासाठी कार्यवाही करावी

*समाज कल्याण विभागाचे आवाहन

बुलडाणा, दि. 28 : दिव्यांग व्यक्तींना दिव्यांगत्व प्रमाणपत्र वितरणासाठी वैश्विक ओळखपत्र प्रणाली विकसित केली आहे. केंद्र शासनाच्या प्रणालीद्वारे दिव्यांगत्व प्रमाणपत्र वितरीत करण्यात येत आहे. जिल्ह्यातील दिव्यांग व्यक्तींनी वैश्विक ओळखपत्र मिळण्यासाठी कार्यवाही करावी, असे आवाहन जिल्हा परिषदेच्या समाज कल्याण विभागाने केले आहे.

दिव्यांग लाभार्थ्यांनी केंद्र शासनाच्या swawlambancard.gov.in या संकेतस्थळावर जाऊन आपली वैयक्तिक पूर्ण माहिती, तसेच दिव्यांगत्वाची माहिती भरुन ऑनलाईन अर्ज करावा. अर्ज भरल्यानंतर दिव्यांग व्यक्तींना त्यांच्या अर्जाची नोंदणी पावती प्राप्त होते. सदर पावतीवर जिल्ह्यातील रुग्णालयाची यादी दिसेल, अर्जदारांनी दिव्यांगत्व प्रकारानुसार नजिकच्या रुग्णालयात तपासणी करुन घ्यावी.

ऑनलाईन अर्ज संबंधित जिल्ह्याच्या जिल्हा शल्यचिकीत्सक, शासकीय महाविद्यालयांचे अधिष्ठाता यांच्या लॉगीन आयडीवर उपलब्ध होईल. संबंधित कार्यालयातील अधिकारी, कर्मचारी ऑनलाईन केलेल्या अर्जाची पडताळणी करतील. पडताळणी केलेल्या ऑनलाईन अर्जासंबंधित दिव्यांगत्वाचे मुल्यांकन करणाऱ्या तज्‍ज्ञांकडे पाठविल्या जाईल. संबंधित तज्‍ज्ञ दिव्यांग लाभार्थ्यांचे मुल्यांकन करुन संकेतस्थळावर ऑनलाईन मुल्यांकन अद्ययावत करतील.

ऑनलाईन अर्ज संबंधित रुग्णालयाच्या दिव्यांग वैद्यकीय मंडळाकडे वर्ग करतील. दिव्यांग वैद्यकीय मंडळाने दिलेले निर्देश संकेतस्थळावर ऑनलाईन अद्यावत केल्यानंतर संबंधित दिव्यांग लाभार्थ्याला वैश्विक ओळखपत्र आणि दिव्यांगत्वाचे प्रमाणपत्र ऑनलाईन उपलब्ध होईल. जिल्हा शल्यचिकीत्सक, अधिष्ठाता यांच्या कार्यालयाकडून ऑनलाईन जनरेट केलेल्या वैश्विक ओळखपत्र राज्यासाठी नेमलेल्या प्रिंटींग एजन्सीकडे ऑनलाईन हस्तांतरीत केले जाईल. प्रिंटींग एजन्सीद्वारे वै‍‍‍श्विक ओळखपत्रे संबंधित लाभार्थ्यांना स्पीड पोस्टद्वारे घरपोच पाठवले जाते.

दिव्यांग व्यक्तींनी दिव्यांगत्वाच्या प्रमाणपत्राकरीता अर्ज दाखल केला नसल्यास swawlambancard.gov.in या संकेतस्थळावर पूर्ण वैयक्तिक माहिती, तसेच दिव्यांगत्वाची माहिती भरुन ऑनलाईन अर्ज करुन वैश्विक ओळखपत्र प्राप्त करुन घ्यावे, असे आवाहन जिल्हा समाज कल्याण अधिकारी मनोज मेरत यांनी केले आहे.

00000

DIO BULDANA NEWS 26.08.202

 केंद्रीय राज्यमंत्री रावसाहेब दानवे यांचा दौरा

बुलडाणा, दि.26 : केंद्रीय राज्यमंत्री रावसाहेब दानवे रविवार, दि. 27 ऑगस्ट रोजी जिल्हा दौऱ्यावर येत आहेत. 

श्री. दानवे सकाळी 9 वाजता भोकरदन येथून निघून सकाळी 10 वाजता बुलडाणा येथे पोहोचतील. त्यानंतर सोनूने हार्ट आणि चाईल्ड केअर हॉस्पीटलचे उद्घघाटन करतील. दुपारी साडेबारा वाजता बुलडाणा येथून चिखलीकडे प्रयाण करतील. त्यानंतर चिखली येथून दिड वाजता जालनाकडे प्रयाण करतील.

००००

DIO BULDANA NEWS 25.08.2023

 बुलडाणा येथे मंगळवारी शासन आपल्या दारी कार्यक्रम

*पत्रकार परिषदेत जिल्हाधिकारी यांची माहिती

बुलडाणा, दि. 25 : शासन आपल्या दारी उपक्रमात जिल्हास्तरीय कार्यक्रम बुलडाणा येथे मंगळवार, दि. 29 ऑगस्ट 2023 रोजी दुपारी 2 वाजता आयोजित करण्यात आला आहे. परिवहन महामंडळाच्या मागील कऱ्हाडे ले आऊट येथे हा कार्यक्रम होणार आहे. या कार्यक्रमाला 25 हजार लाभार्थी उपस्थित राहण्याच्या दृष्टीकोनातून नियोजन करण्यात आले असल्याची माहिती जिल्हाधिकारी भाग्यश्री विसपुते यांनी दिली.

जिल्हाधिकारी कार्यालयातील नियोजन भवनात पत्रकार परिषद घेण्यात आली. यावेळी अतिरिक्त जिल्हाधिकारी दिनेश गिते, निवासी उपजिल्हाधिकारी सदाशिव शेलार, अतिरिक्त मुख्य कार्यकारी अधिकारी बी. एम. मोहन, प्रादेशिक परिवहन अधिकारी प्रसाद गाजरे आदी उपस्थित होते.

जिल्हाधिकारी भाग्यश्री विसपुते म्हणाले, शासनाच्या विविध विभागांसोबत महिला आर्थिक विकास महामंडळ, बचतगटांचा यात सहभाग असणार आहे. आतापर्यंत पाच लाख 75 हजार लाभार्थ्यांना या अभियानात लाभ देण्यात आला आहे. कार्यक्रमाच्या दिवशी आणखी दिड लाख नागरिकांना विविध योजनांचा लाभ देण्यात येणार आहे. या अभियानात आणखी लाभार्थ्यांना लाभ देण्यासाठी विविध विभागांकडून प्रयत्न करण्यात येत आहे.

कार्यक्रमाच्या नियोजनाची तयारी पूर्ण झाली आहे. परिवहन महामंडळाच्या कार्यशाळेमागील जागेत मंडप उभारण्यात येणार आहे. याठिकाणी रोजगार मेळावा, आरोग्य शिबीरासह विविध विभागाच्या योजनांची माहिती देणारे स्टॉल उभारण्यात येणार आहे. लाभार्थ्यांना आणण्यासाठी 350 बसेसची व्यवस्था करण्यात आली आहे. लाभार्थ्यांना डीबीटी, धनादेश, साहित्य वाटप आदी लाभाचे प्रत्यक्ष वाटप करण्यात येणार आहे. त्यासोबत अतिवृष्टीमुळे नुकसान झालेले 70 हजार शेतकऱ्यांना लाभ देण्याच्या दृष्टीकोनातून प्रयत्न सुरू आहेत.

            शासन आपल्या दारी अभियानातून शासनाच्या योजना नागरिकांपर्यंत पोहोचण्यासाठी प्रयत्न करण्यात येत आहे. जिल्हास्तरीय कार्यक्रम यशस्वी होण्यासाठी सर्व नागरिकांनी सहकार्य करावे, असे आवाहन श्रीमती विसपुते यांनी केले.

000000

ओबीसी विद्यार्थ्यांसाठी शैक्षणिक कर्ज व्याज परतावा योजना

*अर्ज दाखल करण्याचे आवाहन

बुलडाणा, दि. 25 : महाराष्ट्र राज्य इतर मागासवर्गीय वित्त आणि विकास महामंडळाकडून ओबीसी विद्यार्थ्याकरिता देशांतर्गत शिक्षणासाठी 10 लाख, तर परदेशातील शिक्षणासाठी 20 लाख रुपये मर्यादेत कर्ज सुविधा राष्ट्रीयकृत बँकामार्फत उपलब्ध करून दिले जाणार आहे. या योजनेमध्ये उमेदवाराला बँकेमध्ये भरलेल्या व्याजाच्या 12 टक्के पर्यंत व्याज परतावा मिळणार आहे. यासाठी पात्र विद्यार्थ्यांनी अर्ज करावेत असे आवाहन करण्यात आले आहे.

या योजनेसाठी उमेदवाराचे वय हे 17 ते 30 वर्षे असावे, महाराष्ट्र राज्याचा रहिवाशी असल्याचा पुरावा, ओबीसी असल्याचा जातीचा दाखला, तहसिलदार यांचे 8 लाख रुपयापर्यतचा कौटुंबिक वार्षिक उत्पन्न दाखला किंवा नॉन क्रीमेलेअरच्या मर्यादेत, बारावीमध्ये 60 टक्के गुणांसह उत्तीर्ण असावा. उमेदवार व पालक यांचे आधार कार्ड, फोटो, आधारकार्ड बचत खाते पासबुकला लिंक असावे. वयाचा पुरावा, शैक्षणिक अभ्यासक्रमाबाबत आवश्यक कागदपत्रे तसेच शैक्षणिक खर्चाचा तपशिलासह महामंडळाच्या msobcfdc.org या अधिकृत वेबसाईटवर ऑनलाइन अर्ज सादर करावेत.

राज्य-देशांतर्गत तसेच परदेशी अभ्यासक्रमामध्ये येणाऱ्या अभ्यासक्रमात आरोग्य विज्ञानमध्ये सर्व पदवी व पदव्युतर अभ्यासक्रम. अभियांत्रिकीमध्ये सर्व पदवी व पदव्युतर अभ्यासक्रम. व्यावसायिक व व्यवस्थापन अभ्यासक्रमात कृषि, अन्न प्रक्रिया व पशू विज्ञान, दुग्ध विज्ञानमधील सर्व संबंधित अभ्यासक्रमांचा समावेश राहणार आहे.

व्याज परतावा व परतफेडीचा कालावधी हा शैक्षणिक अभ्यासक्रम पूर्ण होईपर्यंत बँकेने वितरित केलेल्या कर्ज रक्कमेवरील व्याजाची नियमित परतफेड केलेल्या उमेदवाराला केवळ व्याजाचा परतावा उमेदवाराच्या आधार लिंक बँक खात्यात महामंडळ वर्ग करेल. कर्जाचा कालावधी जास्तीत जास्त 5 वर्षे राहणार आहे.

पात्र उमेदवारांनी अर्ज सादर करावेत तसेच अधिक माहितीसाठी जिल्हा व्यवस्थापक, महाराष्ट्र राज्य इतर मागासवर्गीय वित्त आणि विकास महामंडळ मर्यादित, डॉ. बाबासाहेब आंबेडकर सामाजिक न्याय भवन, तळ मजला, त्रिशरण चौक, चिखली रोड, बुलढाणा, दूरध्वनी क्र. 07262-248285. यांचेशी संपर्क साधावा, असे आवाहन करण्यात आले आहे.

00000

इतर मागासवर्गीय वित्त आणि विकास महामंडळाच्या

 कर्ज प्रकरणात एकरकमी परतावा योजना लागू

बुलडाणा, दि. 25 : महाराष्ट्र राज्य इतर मागासवर्गीय वित्त आणि विकास महामंडळामार्फत लाभार्थींनी घेतलेल्या कर्ज प्रकरणांत संपूर्ण थकीत कर्ज रकमेच्या एकरकमी भरणा करणाऱ्या लाभार्थ्यांसाठी सुधारीत एकरकमी परतावा योजना राबविण्यात येत आहे.

ओबीसी महामंडळाने विविध कर्ज योजनेंतर्गत जिल्ह्यातील इतर मागास प्रवर्गातील लाभार्थींना स्वयंरोजगाराकरीता अल्प व्याज दराने कर्ज वितरीत केले आहे. कर्ज वितरीत झालेल्या लाभार्थींनी या योजनेनुसार संपूर्ण थकीत कर्ज रकमेच्या एकरकमी भरणा केल्यास व्याज रकमेच्या 50 टक्के सवलत देण्यात येणार आहे. तरी महामंडळाच्या थकीत कर्जदारांनी दि. 31 मार्च 2024 पर्यंत थकीत कर्ज भरून या योजनेचा लाभ घेऊन कर्जमुक्त व्हावे, तसेच थकीत मुद्दल व व्याज रकमेचा भरणा करण्यासाठी महामंडळाच्या कार्यालयाला भेट द्यावी किंवा 07262-248285 क्रमांकावर संपर्क साधावा, असे आवाहन जिल्हा व्यवस्थापक, जिल्हा कार्यालय, सामाजिक न्याय भवन, बुलडाणा यांनी केले आहे.

00000

DIO BULDANA NEWS 24.08.2023

 जिल्हा परिषदेच्या अनुकंपाधारकांची यादी प्रसिद्ध 

बुलडाणा, दि. 24 : बुलडाणा जिल्हा परिषदेच्या अनुकंपाधारक उमेदवारांची अंतिम ज्येष्ठता यादी प्रसिद्ध करण्यात आली आहे. या यादीवर आक्षेप असल्यास दहा दिवसांच्या आत आक्षेप नोंदविण्यात यावे, असे आवाहन करण्यात आले आहे.

जिल्हा परिषदेची सन 2023 साठी अनुकंपाधारक उमेदवारांची तात्पुरती सुधारित ज्येष्ठता यादी जिल्हा परिषदेच्या ZPBULDANA.MAHARASHTRA.GOV.IN या वेबसाईटवर प्रसिद्ध करण्यात आली. सदर अनुकंपाधारक उमेदवारांची तात्पुरती ज्येष्ठता यादीवर संबंधितांकडून लेखी आक्षेप मागविण्यात आले. प्राप्त आक्षेपाची पडताळणी करुन अंतिम ज्येष्ठता यादी तयार करण्यात आली. अंतिम ज्येष्ठता यादी दि. 23 ऑगस्ट 2023 रोजी प्रसिद्ध करण्यात आली आहे. या अंतिम ज्येष्ठता यादीवर आक्षेप असल्यास यादी प्रसिद्ध झाल्यापासून 10 दिवसांच्या आत या कार्यालयास लेखी सादर करावेत. सदर अंतिम यादीवर विहित मुदतीत आक्षेप प्राप्त झाले नसल्यास सदर यादी अंतिम समजण्यात येणार आहे. याची सर्व अनुकंपाधारक उमेदवारांनी नोंद घ्यावी, असे आवाहन जिल्हा परिषदेतर्फे करण्यात आले आहे.

0000000

DIO BULDANA NEWS 23.08.2023

 नवभारत साक्षरता कार्यक्रमात निरक्षराचे सर्वेक्षण

*जिल्ह्यातील निरक्षरांचा नव्याने शोध

बुलडाणा, दि. 23 : राष्ट्रीय शैक्षणिक धोरण 2020 नुसार केंद्र शासनाच्या नवभारत साक्षरता कार्यक्रमात दि. ३१ ऑगस्ट २०२३ पर्यंत निरक्षरांचे सर्वेक्षण करण्यात येणार आहे. त्यानुसार २०२३-२४ या आर्थिक वर्षात एकूण १२ लाख ४० हजार निरक्षर नागरिकांना शोधण्याचे उद्दिष्ट निश्चित करण्यात आले आहे. हे सर्वेक्षण शिक्षण विभाग करणार आहे.

शिक्षण विभागातर्फे शिक्षण उपसंचालक, जिल्हा शिक्षण व प्रशिक्षण संस्थांचे प्राचार्य, शिक्षणाधिकारी, शिक्षण निरीक्षक, गटशिक्षणाधिकारी यांना सर्वेक्षणाचे आदेश दिले आहेत. त्यानुसार जिल्ह्यातील प्राथमिक, माध्यमिक आणि उच्च माध्यमिक शाळांचे प्राचार्य, मुख्याध्यापकांना सूचना देण्यात आल्या आहेत. तसेच सर्वेक्षणासाठी आवश्यक प्रपत्रेही पुरविण्यात आली आहेत. दरम्यान निरक्षरांच्या सर्वेक्षणाची जबाबदारी शिक्षण विभागाकडे आहे. शिक्षकांना प्रत्यक्ष वस्ती, वाडी, गाव, खेडी, तांडे, शेतमळा, वार्ड अशा ठिकाणी सर्वेक्षण करावयाचे आहे.

निरक्षरांच्या सर्वेक्षणामध्ये निरक्षराचे नावे, लिंग, जात प्रवर्गनिहाय अद्यावत माहिती संकलित करण्यात येणार आहे. यामुळे राज्यातील निरक्षरांची संख्या निश्चित होणार आहे. या निरक्षरांना ऑनलाईन आणि ऑफलाईन पद्धतीने शिक्षण उपलब्ध करुन देणे हा सर्वेक्षणाचा उद्देश आहे. सदर सर्वेक्षणाच्या माध्यमातून जिल्ह्यातील निरक्षरांची संख्या कळणार आहे.

सर्वेक्षण हे शाळा भरण्यापूर्वी व शाळा सुटल्यानंतर केले जाणार आहे. १५ वर्षे व त्यापुढील सर्व निरक्षरांचा यात समावेश केला जाणार आहे. या कालावधीत शाळाबाह्य विद्यार्थी शोध मोहीम राबविण्यात येणार आहे. त्यामुळे दोन्ही सर्वेक्षण एकत्रित होणार आहेत. त्यासाठी शाळा हे युनिट म्हणून काम करणार आहे. निरक्षरांच्या सर्वेक्षणात शिक्षक घरोघरी जाऊन ही माहिती गोळा करणार आहेत, यामध्ये निरक्षर संख्या, लिंग, प्रवर्ग, दिव्यांग, शिकण्याचे माध्यम अशा विविध बाबीनुसार स्वतंत्रपणे विश्लेषण कले जाणार आहे. त्यासाठी शिक्षकांची सर्वेक्षक म्हणून नियुक्ती केली आहे.

जनगणना २०११ मधील माहितीनुसार गावनिहाय निरक्षरांची आकडेवारी प्राप्त आहे. परंतु गावनिहाय निरक्षरांची नावे अप्राप्त आहेत. त्यामुळे १५ वर्षे वयापुढील निरक्षरांची वास्तविक आकडेवारी कळावी, यासाठी जिल्हाभरात ५ हजार ४५१ सर्वेक्षकांच्या मदतीने सदर सर्वेक्षण दि. ३१ ऑगस्ट २०२३ पर्यंत पूर्ण करण्यात येणार आहे.

00000

आंतरराष्ट्रीय युवादिनी मॅरेथॉन स्पर्धा उत्साहात

बुलडाणा, दि. 23 : जिल्हा एड्स प्रतिबंध व नियंत्रण विभाग, जिल्हा रुग्णालय बुलडाणा व बुलडाणा जिल्हा एथेलेटिक असोसिएशनतर्फे आंतरराष्ट्रीय युवा दिनानिमित्ताने एचआयव्ही एड्स जनजागृती करिता बुधवार, दि. २३ ऑगस्ट रोजी वतीने मॅरेथॉन स्पर्धा घेण्यात आली.

जिल्हा शल्य चिकित्सक डॉ. सुभाष चव्हाण यांच्या मार्गदर्शनाखाली जिल्हा रुग्णालयात महाविद्यालयीन विद्यार्थ्यांकरिता जिल्हास्तरीय मॅरेथॉन स्पर्धा घेण्यात आली. स्पर्धेच्या सुरवातीला एचआयव्ही, एड्सबाबत आणि तंबाखू नियंत्रणाची शपथ घेण्यात आली. युवक आणि एचआयव्ही, एड्सबाबत माहिती, तसेच टोल फ्री क्रमांक १०९७ बाबत माहिती देण्यात आली. अतिरिक्त जिल्हा शल्य चिकित्सक डॉ. भागवत भुसारी यांनी स्पर्धेला हिरवी झेंडी दाखवली. स्पर्धेत १०६ मुलामुलींनी सहभाग घेतला. स्पर्धेत मुलांमधून प्रथम सुजित जाधव, द्वितीय महेश ढोले, तृतीय साहिलसिंग राजपूत, तसेच मुलींमध्ये प्रथम प्रणाली शेगोकार, द्वितीय आकांक्षा निंबाळकर, तृतीय ज्योती आराख यांनी मिळवला. त्यांना पारितोषिके, रोख रक्कम आणि प्रमाणपत्र देऊन गौरविण्यात आले.

यावेळी प्रमुख पाहुणे म्हणून डॉ. भागवत भुसारी, डॉ. घोंगटे, जिल्हा कार्यक्रम अधिकारी प्रमोद टाले, एआरटी सेंटर वैद्यकीय अधिकारी डॉ. लता भोसले, जिल्हा ॲथलेटिक असोशिएशनचे गोपालसिंग राजपूत, विजय वानखडे, महात्मा फुले समाजकार्य महाविद्यालयाचे प्राचार्य नंदूराम गायकवाड, प्रा. अविनाश गेडाम उपस्थित होते.

जिल्हा एड्स प्रतिबंध व नियंत्रण विभागातील जिल्हा पर्यवेक्षक गजानन देशमुख, भागवत कव्हळे, अश्विनी वैष्णव, संदिप राऊत आयसीटीसी विभागातील नरेंद्र सनांसे, पियूष मालगे, इंदू मोरे, भावना कॅम्बेल, एसटीडी समुपदेशक भारत कोळे, एआरटी विभागातील डाटा मॅनेजर लक्ष्मीकांत गोंदकर, समुपदेशक प्रदीप बंबटकार, मिलींद इंगोले, दिपक गवई यांनी स्पर्धेसाठी सहकार्य केले.

00000

शासकीय तंत्र माध्यमिक शाळा केंद्रावर तासिका तत्वावर पदभरती

बुलडाणा, दि. 23 : बुलडाणा येथील शासकीय तंत्र माध्यमिक शाळा केंद्र, पूर्व व्यावसायिक अभ्यासक्रम नववी आणि दहावीकरिता तासिका तत्वावर शिक्षकांची संस्‍था स्तरावर ठरवून दिलेल्या वेळापत्रकाप्रमाणे शिकविण्यासाठी पदे सन 2023-24 करीता भरण्यात येणार आहे. यासाठी इच्छुकांनी अर्ज करावे, असे आवाहन करण्यात आले आहे.

पूर्व व्यवसायिक अभ्यासक्रम इलेक्ट्रीकल टेक्नॉलॉजीसाठी 1 पद असून शैक्षणिक अर्हता डिप्लोमा, बीई इलेक्ट्रीकल आणि एक वर्षाचा अनुभव असल्यास प्राधान्य देण्यात येणार आहे. पूर्व व्यासायिक अभ्यासक्रम मेकॅनिकल टेक्नॉलॉजीसाठी 1 पद असून डिप्लोमा, बीई मेकॅनिकल आणि एक वर्षाचा अनुभव असल्यास प्राधान्य देण्यात येणार आहे.

अभ्यासक्रम शिकविण्याकरिता अत्यंत तात्पुरत्या स्वरुपात घड्याळी तासिका तत्वावर शिकविण्याचे काम देण्यात येणार आहे. वरील पदांसाठी इच्छुक असणाऱ्या उमेदवारांनी सर्व मुळ प्रमाणपत्रासह आणि छायांकित प्रतीसह दि. 31 ऑगस्ट 2023 रोजी सकाळी 11 वाजता मुख्याध्यापकांच्या दालनात स्व:खर्चाने प्रत्यक्ष मुलाखतीस हजर राहावे. सदर पदांवरील उमेदवारास शासकीय नियमानुसार मानधन देय राहणार आहे, असे शासकीय तंत्र माध्यमिक शाळेचे मुख्याध्यापकांनी कळविले आहे. 

00000

DIO BULDANA NEWS 22.08.2023

 

शासन आपल्या दारी उपक्रम यशस्वी करावा

-जिल्हाधिकारी भाग्यश्री विसपुते

बुलडाणा, दि. 22 : शासन आपल्या दारी उपक्रमाचे आयोजन बुलडाणा येथे मंगळवार, दि. 29 ऑगस्ट रोजी करण्यात येणार आहे. यात शासकीय योजनांच्या लाभासह रोजगार मेळावा घेण्यात येणार आहे. त्यामुळे हा उपक्रम यशस्वी करावे, असे आवाहन जिल्हाधिकारी भाग्यश्री विसपुते यांनी केले.

जिल्हाधिकारी कार्यालयात आज शासन आपल्या दारी उपक्रमाच्या आयोजनाच्या अनुषंगाने बैठक घेण्यात आली. यावेळी खासदार प्रतापराव जाधव, अतिरिक्त जिल्हाधिकारी दिनेश गिते, निवासी उपजिल्हाधिकारी सदाशिव शेलार, विशेष कार्य अधिकारी राहुल देशपांडे, अतिरिक्त मुख्य कार्यकारी बी. एम. मोहन आदी उपस्थित होते.

जिल्हाधिकारी श्रीमती विसुपते म्हणाल्या, शासन आपल्या दारी उपक्रम यशस्वी करण्यासाठी विविध विभागांवर जबाबदारी सोपविण्यात आली आहे. त्यांनी ती चोखपणे सांभाळावी. उपक्रमामध्ये लाभार्थ्यांना कार्यक्रमासाठी आणणे हा महत्वाचा भाग आहे. त्याअनुषंगाने वाहतूक आराखडा तयार करावा. लाभार्थ्यांना कार्यक्रमाच्या दिवशी आणताना त्यांची काळजी घेण्यात यावी. बसमध्ये प्राथमिक उपचारासोबतच आरोग्य सेवक, एक कर्मचारी यांची नियुक्ती करण्यात यावी. कार्यक्रमासाठी येणाऱ्या लाभार्थ्यांची गैरसोय होणार नाही याची दक्षता घेण्यात यावी.

मोठ्या प्रमाणावर नागरिक येणार असल्याने कार्यक्रमस्थळी आरोग्य सुविधा उभारण्यात यावी. तसेच फिरत्या शौचालयांची व्यवस्था करण्यात यावी. तसेच परिसरात स्वच्छता ठेवण्यात यावी. शौचालयाअभावी प्रामुख्याने महिलांची गैरसोय होऊ नये. कार्यक्रमाला येणाऱ्या लाभार्थ्यांना रोपे आणि सहभाग प्रमाणपत्र देण्यात येणार आहे. नागरिकांच्या सुरक्षिततेसाठी बॅरेकेटींग आणि आगीच्या स्थितीबाबत योग्य ती काळजी घेण्यात यावी. शहरात मेडीकल असोसिएशन चांगले कार्य आहे. त्यांनाही यात सामावून घ्यावे, तसेच कार्यक्रमाच्या दिवशी शासनाच्या विविध योजनांचा लाभ देण्यात येणार आहे. यासाठी प्रत्येक विभागाने आपले नियोजन करावे, असे आवाहन श्रीमती विसपुते यांनी केले.

00000

मोताळा औद्योगिक प्रशिक्षण संस्थेत दोन नवीन अभ्यासक्रम

बुलडाणा, दि. 22 : मोताळा येथील शासकीय औद्योगिक प्रशिक्षण संस्थेत नवीन अभ्यासक्रमाच्या दोन तुकड्या सुरू होणार आहे. इच्छुकांनी यासाठी प्रवेश घ्यावा, असे आवाहन करण्यात आले आहे.

बेसिक कॉस्मेटोलॉजी एक तुकडी आणि माहिती संप्रेषण तंत्रज्ञान प्रणाली देखभाल या व्यवसायाच्या दोन नवीन तुकड्यांना संलग्नता प्राप्त झाली आहे. त्यानुसार प्रवेश सत्र 2023-24 करिता कॉस्मेटॉलॉजी 24 जागा आणि आयसीटीएसएम 24 जागांकरिता प्रवेश प्रक्रिया सुरू करण्यात आली आहे. दहावी उत्तीर्ण उमेदवारांनी आजच प्रवेश निश्चित करावा, असे आवाहन संस्थेचे प्राचार्य एस. डी. गंगावणे यांनी केले आहे.

0000000

मोताळा आयटीआयमध्ये स्मार्ट क्लासरूमचे उद्घाटन

बुलडाणा, दि. 22 : मोताळा येथील शासकीय औद्योगिक प्रशिक्षण संस्थेत आजादी का अमृत महोत्सव आणि मेरी माटी मेरा देश यानिमित्ताने दि. 15 ऑगस्ट रोजी स्मार्ट क्लासरुमचे उद्घाटन मुख्यमंत्री एकनाथ शिंदे यांनी दूरदृश्य प्रणालीद्वारे केले.

कौशल्य विकास मंत्री मंगलप्रभात लोढा दूरदृश्य प्रणालीद्वारे उपस्थित होते. मोताळा येथील कार्यक्रमाला प्राचार्य एस. डी. गंगावणे, आयएमसी अध्यक्ष पी. एन. जाधव उपस्थित होते. डिजिटल इंडिया उपक्रमांतर्गत राज्यातील 419 शासकीय औद्योगिक प्रशिक्षण संस्थेत स्मार्ट क्लासरूम उपक्रम राबविण्यात येत आहे. यात पहिल्या टप्प्यात 75 व्हर्च्युअल क्लासरुमचे उद्घाटन करण्यात आले. कौशल्य रोजगार उद्योजकता व नाविन्यता विभागाचे अप्पर मुख्य सचिव आशिषकुमार सिंह, आयुक्त एन. रामास्वामी, व्यवसाय शिक्षण व प्रशिक्षण संचालनालयाचे संचालक दिगंबर दळवी उपस्थित होते.

000000

जिल्हा विधी सेवा प्राधिकरणाचे कायदेविषयक जनजागृती शिबीर

बुलडाणा, दि. 22 : जिल्हा विधी सेवा प्राधिकरण, जिल्हा वकील संघ आणि जिजामाता महाविद्यालयातर्फे जिजामाता महाविद्यालयात कायदेविषयक जनजागृती शिबीर गुरूवार, दि. 17 ऑगस्ट रोजी सकाळी 11 वाजता घेण्यात आले.

जिजामाता महाविद्यालयाचे प्राचार्य डॉ. प्रशांत कोठे अध्यक्षस्थानी होते. शिबीरासाठी प्रमुख वक्ते विधी सेवा बचाव पक्षाचे वकील सहायक सारीका भोलाने यांनी वाहतुकीचे नियम तर व्ही. पी. मारोडकर यांनी रॅगिग विरोधी कायद्याबाबत सविस्तर मार्गदर्शन केले. जिल्हा विधी सेवा प्राधिकरणाचे सचिव तथा दिवाणी न्यायाधीश वरिष्ठ स्तर हेमंत भुरे यांनी जिल्हा विधी सेवा प्राधिकरणातर्फे जनजागृती शिबीराचे आयोजन नियमित करण्यात येते. तसेच जिल्हा विधी सेवा प्राधिकरणाच्या कार्याबद्दल सविस्तर माहिती दिली. वाहतुकीच्या नियमांचे पालन करण्याचे आवाहन केले.

सहाय्यक सारीका भोलाने यांनी सूत्रसंचालन केले. प्रा. डॉ. भरत जाधव यांनी आभार मानले. कार्यक्रमासाठी अधीक्षक एस. एस. अवचार, प्रविण खर्चे, वैभव मिलके यांनी पुढाकार घेतला.

000000

वजन काट्यांच्या अनधिकृत विक्रीवर आळा

बुलडाणा, दि. 22 : वजन काट्यांच्या अनधिकृत विक्री आणि दुरुस्तीस आळा घालण्यासाठी जनजागृती करण्यात येत आहे.

वजन, माप आणि काटे हे वैध मापन शास्त्र कार्यालयाकडून प्राधिकृत केलेल्या दुकानातूनच घेण्यात यावे. वजनाचे साहित्य घेताना शासन शुल्क भरण्यात आल्याची पावती व पडताळणी व मुद्रांकन केलेला शिक्का तपासूनच घ्यावे. तसेच चीनमधून आयात अप्रमाणित वजन काटे व्यवसायासाठी वापरणे हा वैध मापन शास्त्र कायदा 2009 अन्वये गुन्हा आहे. त्यामुळे अशा वजन काट्याचा वापर करणे टाळावे, असे आवाहन करण्यात आले आहे.

000000

बाल पुरस्कारासाठी प्रस्ताव सादर करण्याचे आवाहन

बुलडाणा, दि. 22 : लहान मुलांना असामान्य शौर्यासाठी आणि शैक्षणिक, क्रीडा, कला व संस्कृती तसेच समाजसेवेच्या क्षेत्रात उल्लेखनीय कामगिरी केल्याबद्दल भारत सरकारकडून प्रधानमंत्री राष्ट्रीय बाल पुरस्कार देण्यात येतो. पुरस्कारासाठी awards.gov.in आणि wcd.nic.in या पोर्टलवर प्रक्रिया सुरू करण्यात आली आहे. इच्छुकांनी दि. 31 ऑगस्ट 2023 पर्यंत नामांकने सादर करावीत, असे आवाहन जिल्हा महिला व बाल विकास अधिकारी अमोल डीघुळे यांनी केले आहे.

000000

बाल संरक्षणासाठी कार्यरत संस्थांनी अर्ज करण्याचे आवाहन

बुलडाणा, दि. 22 : बालकांच्या संरक्षणासाठी जिल्ह्यातील कार्यरत संस्थांकडून स्वयंसेवी संस्थांच्या प्रतिनिधीची सदस्य म्हणून नामनिर्देशन करण्यात येणार आहे. यासाठी दि. 31 ऑगस्ट 2023 पर्यंत अर्ज करण्याचे आवाहन करण्यात आले आहे.

बाल न्याय (मुलांची काळजी व संरक्षण) अधिनियम 2015 कलम 44 व 45 तसेच महाराष्ट्र राज्य बाल न्याय नियम 2018 मधील तरतुदीनुसार प्रतिपालकत्व व 26 नुसार प्रायोजकत्व योजनेबाबत तरतूद करण्यात आली आहे. या योजनेच्या प्रभावी अंमलबजावणीकरीता जिल्हास्तरावर प्रायोजकत्व आणि प्रतिपालकत्व मान्यता समिती गठन करण्यात येणार आहे. समितीवर जिल्हा महिला व बाल विकास अधिकारी यांच्यामार्फत जिल्ह्यात बाल संरक्षण क्षेत्रात कार्य करणाऱ्या स्वयंसेवी संस्थाकडून एका स्वयंसेवी संस्थांच्या प्रतिनिधीचे सदस्य म्हणून नामनिर्देशन मागविण्यात येत आहे. प्रतिपालकत्व आणि प्रायोजकत्व मान्यता समितीमध्ये सदस्य म्हणून निवडण्याकरीता प्रस्तावासहित अर्ज जिल्हा महिला व बाल विकास अधिकारी कार्यालय, सुवर्णनगर, बसस्थानक मागे, मुठ्ठे ले आऊट, डॉ. जोशी हॉस्पिटल जवळ, बुलडाणा या पत्यावर दि. 31 ऑगस्ट 2023 पर्यंत सादर करावेत, तसेच अर्जाची प्रत dwcd_bul@yahoo.com या मेलवर पाठविण्यात यावी, असे आवाहन जिल्हा बाल संरक्षण अधिकारी यांनी केले आहे.

0000000

जिल्हास्तरीय शालेय आर्चरी क्रीडा स्पर्धेचे उद्घाटन

बुलडाणा, दि. 22 : क्रीडा व युवक सेवा संचालनालयांतर्गत जिल्हा क्रीडा परिषद आणि जिल्हा क्रीडा अधिकारी कार्यालयातर्फे जिल्हास्तरीय शालेय आर्चरी क्रीडा स्पर्धेचे उद्घाटन आज दि. 22 ऑगस्ट रोजी पार पडले.

जिल्हास्तरीय शालेय आर्चरी क्रीडा स्पर्धेचे 14, 17, 19 वर्षाआतील मुले, मुलींच्या क्रीडा स्पर्धांचे आयोजन दि. 22 ते 23 ऑगस्ट 2023 रोजी बुलडाणा तालुका क्रीडा संकुलात आयोजन करण्यात आले.  स्पर्धेचे उद्घाटन मंगळवार, दि. 22 ऑगस्ट 2023 रोजी सकाळी 10 वाजता जिल्हा आर्चरी संघटनेचे सचिव प्रा. डॉ. मनोज व्यवहारे, ॲड. उदय कारंजकर, दिगंबर पाटील, मनिषा वारे यांच्या हस्ते करण्यात आले.

यावेळी प्रा. डॉ. व्यवहारे यांनी खेळाडूंना मार्गदर्शन केले. या स्पर्धा जिल्हा क्रीडा अधिकारी गणेश जाधव यांच्या मार्गदर्शनाखाली घेण्यात येत आहे. स्पर्धेकरीता मुख्य पंच म्हणून प्रणीत देशमुख, तर नागेश निंबाळकर, विनया नारनवरे, अभिषेक पिसाळ, अजित श्रीराम यांनी पंच म्हणून काम पाहिले. उद्घाटन कार्यक्रमाला डॉ. प्रवीण नरवाडे, नितीन अघाव, अंकुश बोराडे, संतोष शिंदे, प्रदीप शिंगणे, भरत ओळेकर, सागर उबाळे, श्री. पवार उपस्थित होते. तालुका क्रीडा अधिकारी बी. एस. महानकर सूत्रसंचालन करून आभार मानले.

00000