सोनाळा येथे ‘सेवा संकल्प’ अंतर्गत NCD तपासणी व जनजागृती ; भटक्या-विमुक्त नागरिकांची आरोग्य तपासणी; निरोगी जीवनशैलीबाबत मार्गदर्शन

 

बुलढाणा, दि. ३० (जिमाका) : राष्ट्रीय आरोग्य अभियानांतर्गत राज्यातील भटक्या व विमुक्त जाती-जमातीतील नागरिकांना विविध शासकीय आरोग्य सेवा व योजनांचा लाभ मिळवून देण्याच्या उद्देशाने ‘सेवा संकल्प’ कार्यक्रमाचे आयोजन करण्यात येत आहे. या कार्यक्रमांतर्गत सोनाळा येथील मंडल अधिकारी कार्यालयात असंसर्गजन्य आजार (NCD) तपासणी व जनजागृती कार्यक्रम घेण्यात आला.

या उपक्रमात उपस्थित नागरिकांची प्राथमिक आरोग्य तपासणी करण्यात आली. यामध्ये रक्तदाब, रक्तातील साखर, वजन, उंची व बॉडी मास इंडेक्स (BMI) आदी तपासण्या करण्यात आल्या. तपासणीदरम्यान आरोग्यविषयक समस्या आढळलेल्या नागरिकांना आवश्यकतेनुसार पुढील तपासणी व उपचारासाठी संबंधित आरोग्य संस्थेकडे संदर्भित करण्यात आले.

कार्यक्रमादरम्यान मधुमेह, उच्च रक्तदाब, हृदयरोग व कर्करोग यांसारख्या असंसर्गजन्य आजारांपासून बचाव करण्यासाठी नियमित आरोग्य तपासणी, संतुलित आहार आणि नियमित व्यायामाचे महत्त्व नागरिकांना समजावून सांगण्यात आले. तसेच तंबाखू, गुटखा व धूम्रपानाचे सेवन टाळण्यासोबतच मद्यपानापासून दूर राहण्याबाबत आरोग्य शिक्षण व समुपदेशन करण्यात आले.

यावेळी पात्र नागरिकांना उपलब्ध असलेल्या विविध शासकीय आरोग्य सेवा व योजनांची माहिती देण्यात आली. आरोग्यविषयक समस्या असलेल्या लाभार्थ्यांना पुढील उपचार, तपासणी व आवश्यक आरोग्य सेवांबाबत मार्गदर्शन करण्यात आले.

भटक्या व विमुक्त जाती-जमातीतील नागरिकांपर्यंत आरोग्य सेवा पोहोचविण्यासाठी अशा प्रकारचे तपासणी व जनजागृती उपक्रम प्रभावीपणे राबविण्यात येत असून, नागरिकांनी उपलब्ध शासकीय आरोग्य सेवांचा लाभ घ्यावा, असे आवाहन आरोग्य विभागामार्फत करण्यात आले.

00000