अमडापूर येथे 8 मार्च रोजी विधी सेवा महाशिबिर व शासकीय योजनांचा महामेळावा
बुलढाणा (जिमाका), दि. 6 : जिल्हा विधी सेवा प्राधिकरण बुलडाणा, तालुका विधी
सेवा समिती व तालुका वकील संघ चिखली, जिल्हाधिकारी कार्यालय बुलढाणा तसेच जिल्हा परिषद
बुलढाणा यांच्या संयुक्त विद्यमाने चिखली तालुक्यातील जगदंबा बल्लाळ देवी संस्था, अमडापूर
येथे दि. 8 मार्च रोजी सकाळी 10 वाजता विधी सेवा महाशिबिर, शासकीय सेवा योजनांचा महामेळावा
व आरोग्य तपासणी शिबिर आयोजित करण्यात आले आहे.
या महाशिबिरामध्ये सुमारे ५० शासकीय स्टॉलद्वारे
नागरिकांना विविध योजनांची माहिती व लाभ एकाच छताखाली उपलब्ध करून दिला जाणार आहे.
यामध्ये आधार कार्ड नोंदणी व दुरुस्ती, संजय गांधी निराधार योजना, आयुष्यमान भारत कार्ड,
जात व उत्पन्न दाखले, नवीन रेशन कार्ड तसेच इतर विविध शासकीय सेवा उपलब्ध करून दिल्या
जाणार आहेत. याशिवाय नागरिकांना नालसाच्या विविध योजना, लोकअदालत व मध्यस्थीचे फायदे
याबाबत मार्गदर्शन करण्यात येणार आहे. तसेच आरोग्य तपासणी शिबिरात डोळ्यांची तपासणी,
ओरल कॅन्सर तपासणी, दातांची तपासणी* आदी विविध आजारांची तपासणी केली जाणार आहे. नागरिकांसाठी
मोफत कायदेशीर सल्ला व मार्गदर्शन देखील उपलब्ध करून देण्यात येणार आहे. शेतकरी व गरजू
नागरिकांनी या महाशिबिराचा लाभ घ्यावा, असे आवाहन जिल्हा विधी सेवा प्राधिकरण तथा प्रमुख
जिल्हा व सत्र न्यायाधीश अध्यक्ष आर. एन. रोकडे यांनी केले आहे.
00000
Comments
Post a Comment