ऑटो रिक्षा व टॅक्सी परवान्यांच्या खुले धोरणास स्थगिती; इरादापत्र देणे थांबविले

 

बुलढाणा, (जिमाका) दि. 12 : राज्यातील विविध संघटनांकडून ऑटो रिक्षा व टॅक्सी परवान्यांचे खुले धोरण बंद करण्याबाबत शासनाकडे विनंत्या प्राप्त झाल्या आहेत. या पार्श्वभूमीवर दि. 9 मार्च 2026 रोजी परिवहन मंत्र्यांच्या अध्यक्षतेखाली झालेल्या बैठकीत ऑटो रिक्षा व टॅक्सी परवान्यांच्या खुले धोरणास तात्पुरती स्थगिती देण्याचे निर्देश देण्यात आले आहेत.

या निर्णयानुसार ऑटो रिक्षा व टॅक्सी परवान्यांसाठी इरादापत्र (Letter of Intent) देण्याची प्रक्रिया सध्या स्थगित करण्यात आली असल्याची माहिती उप प्रादेशिक परिवहन अधिकारी, बुलढाणा यांनी दिली आहे.

दरम्यान, शासनाकडून पुढील आदेश प्राप्त होईपर्यंत ऑटो रिक्षा व टॅक्सी परवान्यांसंदर्भातील खुले धोरण राबविण्यात येणार नसल्याचेही स्पष्ट करण्यात आले आहे. तसेच या संदर्भातील पुढील सूचना मिळाल्यानंतरच पुढील कार्यवाही करण्यात येणार असल्याचे प्रशासनाने सांगितले आहे.

000