माटरगाव येथे उद्या ‘छत्रपती शिवाजी महाराज महसूल समाधान शिबीर’; नागरिकांनी लाभ घेण्याचे आवाहन

 

बुलढाणा, दि. 14 (जिमाका) :  महसूल व वन विभागाच्या निर्देशानुसार शेगाव तालुक्यातील माटरगाव मंडळात शुक्रवार, दि. 15 मे 2026 रोजी सकाळी 9 वाजता जि.प. हायस्कूल, माटरगाव बु. येथे छत्रपती शिवाजी महाराज महसूल समाधान शिबीर आयोजित करण्यात आले आहे.

या शिबिरामध्ये नागरिकांना महसूल, कृषी, आरोग्य, पुरवठा, निवडणूक व विविध शासकीय योजनांशी संबंधित सेवा एकाच ठिकाणी उपलब्ध करून देण्यात येणार आहेत. शिबिरात ७/१२ व ८-अ उताऱ्यांचे वाटप, विविध फेरफार नोंदी, जिवंत ७/१२ अंतर्गत नोंदी, विस्तारित जिवंत ७/१२ योजनेअंतर्गत अर्ज स्वीकारणे, सलोखा योजना तसेच पी.एम. किसान योजनेअंतर्गत पात्र शेतकऱ्यांचे लँड सीडिंग करण्यात येणार आहे. याशिवाय नैसर्गिक आपत्तीग्रस्त शेतकऱ्यांचे ई-केवायसी, फेरफार अदालत, अॅग्रीस्टॅक अंतर्गत शेतकरी ओळख क्रमांक तयार करणे, ई-हक्क प्रणाली अंतर्गत अर्ज स्वीकारणे, ई-पीक पाहणी, ई-चावडीद्वारे जमीन महसूल वसुली आदी सेवा देण्यात येतील.

शिबिरात नवीन आधार नोंदणी व आधार अद्ययावत करणे, उत्पन्न, जात, नॉन-क्रीमीलेयर, राष्ट्रीयत्व, वय व अधिवास प्रमाणपत्रांसाठी ई-अर्ज स्वीकारले जाणार आहेत. तसेच संजय गांधी योजना, रेशनकार्ड संदर्भातील अर्ज, नवीन मतदान ओळखपत्र नोंदणी व दुरुस्ती, आधार-मतदान जोडणी अर्ज स्वीकारण्यात येणार आहेत.

आरोग्य विभागामार्फत आभा कार्ड, डिजिटल हेल्थ कार्ड, प्रधानमंत्री जन आरोग्य योजना व महात्मा फुले जन आरोग्य योजना संदर्भातील अर्ज प्रक्रिया करण्यात येणार आहे. कृषी विभागाच्या विविध योजनांसाठी अर्ज स्वीकारणे, शेततळे योजना, पंतप्रधान आवास योजना व इतर घरकुल योजनांचे अर्ज तसेच जन्म, मृत्यू व विवाह नोंदणी प्रमाणपत्रांसाठी अर्ज स्वीकारले जाणार आहेत.

या शिबिरांचा माटरगाव मंडळातील सर्व नागरिकांनी तसेच शालेय व महाविद्यालयीन विद्यार्थ्यांनी मोठ्या संख्येने उपस्थित राहून लाभ घ्यावा, असे आवाहन शेगाव तहसीलदार यांनी केले आहे.

00000