दिव्यांगांसाठी फिरत्या वाहनावरील दुकान; 6 फेब्रुवारीपर्यंत ऑनलाईन अर्ज मागविले

 

दिव्यांगांसाठी फिरत्या वाहनावरील दुकान; 6 फेब्रुवारीपर्यंत ऑनलाईन अर्ज मागविले

 

        बुलढाणा,दि.28 (जिमाका) : महाराष्ट्र दिव्यांग वित्त व विकास महामंडळामार्फत दिव्यांग व्यक्तींना हरित उर्जेवर चालणाऱ्या पर्यावरणस्नेही फिरत्या वाहनावरील दुकान मोफत उपलब्ध करुन देण्यात येत आहे. या योजनेचा लाभ घेण्यासाठी इच्छूक व गरजू दिव्यांगांनी दि. 6 फेबुवारी 2025 पर्यंत ऑनलाईन अर्ज करावा, असे आवाहन महाराष्ट्र दिव्यांग वित्त व विकास महामंडळाचे जिल्हा व्यवस्थापक यांनी केले आहे.

 

            दिव्यांग स्वावलंबी होण्यादृष्टीने दि. 10 जून 2019 रोजीच्या शासन निर्णयानुसार हरित उर्जेवर चालणाऱ्या पर्यावरणस्नेही फिरत्या वाहनावरील दुकान (मोबाईल ऑन ई-व्हेईकल) मोफत उपलब्ध करुन देण्यासाठी योजनेला मान्यता देण्यात आली आहे. या योजनेच्या अंमलबजावणीची कार्यवाही महाराष्ट्र दिव्यांग वित्त व विकास महामंडळ, मर्यादित यांच्या स्तरावरुन होणार आहे.

 

दिव्यांग व्यक्तींना पुरेशा सोयी-सुविधा उपलब्ध करुन रोजगार निर्मितीस चालना देणे, व्यक्तींचे आर्थिक व सामाजिक पुनर्वसन करणे. सर्वसामान्य व्यक्तींप्रमाणे दिव्यांग व्यक्तींना त्यांच्या परिवार किंवा कुटुंबासमवेत जीवन जगण्यास सक्षम करणे हा योजनेचा उद्देश आहे.

 

            अर्ज नोंदणी करण्यासाठी पोर्टल सुरु करण्यात आले असून इच्छूक व गरजू दिव्यांगांनी https://register.mshfdc.co.in या लिंक वर ऑनलाईन अर्ज दि. 6 फेब्रुवारी रोजी सायंकाळी 6 वाजेपर्यंत मुदत देण्यात आली आहे. सदर योजनेचा अधिकाधिक दिव्यांगांनी लाभ घ्यावा.

00000000