मलकापूर येथील क्रांतीज्योती सावित्रीबाई फुले शासकीय वसतीगृहात प्रवेश प्रक्रिया सुरू

 

बुलढाणा दि. 2 (जिमाका): सामाजिक न्याय व विशेष सहाय्य विभाग, महाराष्ट्र राज्य अंतर्गत क्रांतीज्योती सावित्रीबाई फुले शासकीय मुलींचे वसतीगृह, मलकापूर (जि. बुलढाणा) येथे शैक्षणिक वर्ष 2026-27 साठी ऑनलाईन प्रवेश प्रक्रिया सुरू झाली आहे.

वसतीगृह प्रशासनाने दिलेल्या माहितीनुसार, शालेय विभागातील विद्यार्थीनींसाठी प्रवेश अर्ज करण्याची मुदत 1 जून 2026 ते 30 जून 2026 अशी असून, इयत्ता 11 वी तसेच बिगर व्यावसायिक अभ्यासक्रमांसाठी 15 जुलै 2026 पर्यंत ऑनलाईन अर्ज करता येणार आहेत.

सन 2026-27 मध्ये शालेय, कनिष्ठ महाविद्यालयीन व बिगर व्यावसायिक अभ्यासक्रमांच्या रिक्त जागांवर गुणवत्ता व प्रवर्गनिहाय प्रवेश दिला जाणार आहे. अनुसूचित जाती, अनुसूचित जमाती, विमुक्त जाती, भटक्या जमाती, विशेष मागास प्रवर्ग, इतर मागासवर्ग तसेच खुल्या प्रवर्गातील दिव्यांग व अनाथ विद्यार्थीनींना शासनाने निर्धारित केलेल्या आरक्षणानुसार प्रवेश दिला जाणार आहे.

प्रवेशासाठी इच्छुक विद्यार्थीनींनी www.hmas.mahait.org या संकेतस्थळावर जाऊन सामाजिक न्याय व विशेष सहाय्य विभागाच्या वसतीगृह प्रवेश पोर्टलवर ऑनलाईन अर्ज करावेत, असे आवाहन वसतीगृह प्रशासनाने केले आहे.

जास्तीत जास्त मागासवर्गीय व गरजू विद्यार्थीनींना या योजनेचा लाभ मिळावा तसेच कोणतीही पात्र विद्यार्थीनी प्रवेशापासून वंचित राहू नये, यासाठी पालक व विद्यार्थीनींनी मुदतीत अर्ज सादर करावेत, असे आवाहनही प्रशासनाच्या वतीने करण्यात आले आहे.

000000