नारी शक्ती महिला सम्मान बचतपत्र योजनेत 8 डिसेंबरपर्यंत सहभागी होण्याचे आवाहन

 

बुलडाणा, दि. 20 (जिमाका): केंद्रीय अर्थसंकल्पात नारी शक्तीसाठी महिला सन्मान बचत प्रमाणपत्र 2023 योजना जाहीर केली असून, 1 एप्रिल 2023 पासून ती टपाल कार्यालयामध्ये उपलब्ध करून देण्यात आली आहे. त्यामुळे जिल्ह्यातील जास्तीत जास्त महिलांनी योजनेचा लाभ घेण्यासाठी 8 डिसेंबर 2023 पर्यंत सहभागी होण्याचे आवाहन टपाल अधीक्षक गणेश आंभोरे यांनी केले आहे.

या योजनेमार्फत महिला खातेदार स्वतः किंवा पालकांना आपल्या अल्पवयीन मुलीच्या नावे  1 हजार ते 2 लक्ष रुपये जमा करून वार्षिक 7.5 टक्के त्रैमासिक चक्रवाढ व्याज मिळेल. त्यासाठी खातेदाराला आपले आधार कार्ड, पॅन कार्ड, 2 पासपोर्ट आकाराचे छायाचित्र सोबत जोडावे लागेल. खातेदार दि. 31 मार्च 2025 पर्यंत दोन खात्यांमध्ये 3 महिन्याच्या अंतराने खाते उघडू शकतो.  या योजने अंतर्गत महिलांना आर्थिकदृष्ट्या सक्षम करण्यासाठी महाराष्ट्रातील सर्व टपाल कार्यालयात दि. 20 नोव्हेंबर ते 8 डिसेंबर 2023 “नारी शक्ती महिला बचतपत्र अभियान राबविण्यात येणार आहे. जिल्ह्यातील  महिलांनी महिला सम्मान बचत पत्र योजनेत सहभागी होण्यासाठी जवळच्या टपाल कार्यालयाशी संपर्क साधण्याचे आवाहन त्यांनी केले आहे.

000000