सेवानिवृत्तांनी निवृत्तीवेतनाबाबत अडचण असल्यास कोषागार कार्यालयाशी संपर्क करावा - जिल्हा कोषागार अधिकारी

• जिल्हा कोषागार कार्यालयात सेवानिवृत्तांचा मेळावा

बुलडाणा, दि. 6 -  राज्य शासकीय अधिकारी, कर्मचारी यांना आपल्या निवृत्ती वेतनाबाबत अडचण येत असल्यास त्यांनी तात्काळा आमच्या जिल्हा कोषागार कार्यालयाशी, उपकोषागार कार्यालयांशी संपर्क करावा, असे आवाहन जिल्हा कोषागार अधिकारी दिनकर बावस्कर यांनी केले आहे.

  जिल्हा कोषागार कार्यालयात राज्य शासकीय निवृत्ती वेतन धारक अथवा कुटूंब निवृत्ती वेतन धारकांचा मेळावा 5 नोव्हेंबर रोजी आयोजित करण्यात आला होता. त्यावेळी ते अध्यक्षस्थानावरून बोलत होते. याप्रसंगी अप्पर कोषागार अधिकारी संजय अंभोरे, निवृत्ती वेतन धारकांच्या कल्याणकारी संघटनेचे अध्यक्ष श्री. पऱ्हाड, सेंट्रल बँक ऑफ इंडियाचे व्यवस्थापक श्री. सिन्हा, बँक ऑफ इंडियाचे व्यवस्थापक श्री. शेळके, अन्य अप्पर कोषागार अधिकारी उपस्थित होते.

   मेळाव्यात निवृत्ती वेतन धारकांच्या विविध समस्यांवर चर्चा करण्यात आली. तसेच काही समस्या तात्काळा सोडविण्यात आल्या. यावेळी निवृत्ती वेतन धारकांच्या नियमित तक्रारी सोडविण्यासाठी कोषागार कार्यालयामध्ये स्वतंत्र तक्रार निवारण कक्षाचे उद्घाटन ज्येष्ठ निवृत्ती वेतन धारक श्री. इंगळे यांच्याहस्ते करण्यात आले. आभार प्रदर्शन श्री. भोलाने यांनी केले. मेळाव्याच्या यशस्वीतेसाठी पंकज गवई, राहुल भोलाने, मयुरी लेकुरवाळे, शिवनारायण बारगजे, सविता आढाव, दिपाली वानखडे, दुर्गा चव्हाण व तृप्ती सरोदे आदी कर्मचाऱ्यांनी प्रयत्न केले. मेळाव्याला 150 निवृत्ती वेतन धारक उपस्थित होते.

                                                            *******

अल्पसंख्यांक खासगी व अपंग शाळांमध्ये पायाभूत

सुविधा पुरविण्याबाबत प्रस्ताव आमंत्रित

बुलडाणा, दि. 6 : धार्मिक अल्पसंख्यांक विद्यार्थीबहुल शासनमान्य खाजगी अनुदानीत, विनाअनुदानीत, कायम विनाअनुदानित शाळा, कनिष्ठ महाविद्यालये, औद्योगिक प्रशिक्षण संस्था, नगर परिषद शाळा व अपंग शाळांमध्ये पायाभूत सोयी-सुविधा पुरविण्यासाठी अनुदान योजनेअंतर्गत इच्छुक शाळांकडून अर्ज मागविण्याबाबत प्रस्ताव मागविण्यात येत आहे. शाळांनी 7 ऑक्टोंबर 2015 च्या शासन निर्णयामधील विहीत नमुन्यातील परिपूर्ण अर्ज आवश्यक कागदपत्रे जोडून प्रस्ताव  सादर करण्याची अंतिम मुदत 31 ऑगस्ट 2019 होती. ती मुदत वाढविण्यात आली असून इच्छुक शाळांनी जिल्हाधिकारी कार्यालयाकडे 30 नोव्हेंबरपर्यंत प्रस्ताव सादर करावे.

इच्छुक शाळा, कनिष्ठ महाविद्यालय, औद्योगिक प्रशिक्षण संस्था व अपंग शाळांनी संपूर्ण भरलेला अर्ज अल्पसंख्यांक विभाग, जिल्हाधिकारी कार्यालय, बुलडाणा येथे दि. 30 नोव्हेंबर, 2019 पर्यंत सादर करावे.  विहित मुदतीनंतर प्राप्त झालेले प्रस्ताव स्वीकारले जाणार नाही. अर्ज सादर करून योजनेचा लाभ घ्यावा, असे आवाहन जिल्हाधिकारी कार्यालयाच्यावतीने प्रसिद्धी पत्रकान्वये करण्यात आले आहे.  

                                                                        ******

डॉ झाकीर हुसैन मदरसा आधुनिकीकरण योजनेच्या प्रस्ताव सादर करण्यास मुदतवाढ

·          30 नोव्हेंबर 2019 अंतिम मुदत

बुलडाणा, दि. 6 :  डॉ झाकीर हुसेन मदरसा आधुनिकीकरण योजना सन 2019-20 अंतर्गत प्रस्ताव सादर करण्यास यापूर्वी 31 ऑगस्ट 2019 मुदत होती. सदर मुदत वाढविण्यात आली असून 11.10.2013 च्या शासन निर्णयातील विहीत नमुन्यातील परिपूर्ण अर्ज आवश्यक कागदपत्रे जोडून प्रस्ताव 30 नोव्हेंबर 2019 पर्यंत मागविण्यात येत आहे. तरी जिल्ह्यातील सदर योजनेतंर्गत अनुदान मिळवू इच्छिणाऱ्या निवासी मदरसांनी दिनांक 11.10.2013 च्या शासन निर्णयामधील निकषांनुसार विहीत नमुन्यातील परिपूर्ण भरलेले प्रस्ताव कागदपत्रांच्या पुर्ततेसह अल्पसंख्यांक विभाग, जिल्हाधिकारी कार्यालय, बुलडाणा येथे 30 नोव्हेंबर 2019 पर्यंत सादर करावे व या योजनेचा लाभ घ्यावा. विहीत मुदतीनंतर प्राप्त झालेले प्रस्ताव स्वीकारले जाणार नाहीत, असे जिल्हाधिकारी कार्यालयाच्यावतीने प्रसिद्धी पत्रकान्वये कळविण्यात आले आहे.  

                                                                        ******

              पाळणाघर चालविणाऱ्या इच्छूक संस्थांनी 20 नोव्हेंबरपर्यंत प्रस्ताव सादर करावे

बुलडाणा, दि. 6: जिल्हा परिषद अंतर्गत असलेले एकात्मिक बाल विकास सेवा योजना कक्षातर्फे  जिल्ह्यातील ज्या स्वयंसेवी संस्थांना खाजगीरित्या पाळणाघर चालवायची आहेत. अशा सर्व पाळणाघर चालविणाऱ्या संस्था चालकांनी शासन निर्णय 7 जानेवारी 2019 च्या अटी व शर्ती नुसार 20 नोव्हेंबर 2019 पर्यत एकात्मिक बाल विकास सेवा योजना कक्ष, जिल्हा परिषद, बुलडाणा येथे प्रस्ताव सादर करावे, असे आवाहन जिल्हा परिषदचे मुख्य कार्यकारी अधिकारी यांनी प्रसिध्दीपत्रकाद्वारे केले आहे.